ပုဂံမြို့သစ် အရှေ့မြောက်ဘက်ရှိ ရှေးဟောင်း တာမဏီဘုရားစု အနီး ခွင့်ပြုချက်မရဘဲ သံဇကာများဖြင့် ခြံဝန်းခတ် ထားမှုအား ယမန်နေ့ (ဇွန်လ ၂ ရက်) ညနေပိုင်းက စတင် ဖျက်သိမ်းနေပြီ ဖြစ်ကြောင်း ရှေးဟောင်းသုတေသနနှင့် အမျိုးသားပြတိုက် ဦးစီးဌာန (ပုဂံဌာနခွဲ)မှ သိရသည်။

ယမန်နေ့ နေ့လယ်ပိုင်း၌ တာမဏီ ကျောင်းဆရာတော် နှင့် မူလမြေပိုင်ရှင်တို့ ရှေး/သုဌာနမှ တာဝန်ရှိသူများနှင့် လာရောက် တွေ့ဆုံ ရှင်းလင်းပြောဆိုပြီးနောက် ယင်းနေ့ ည နေပိုင်းတွင် စတင် ဖျက်သိမ်းခြင်း ဖြစ်ကြောင်း
အဆိုပါ ပုဂံဌာနခွဲမှ ညွှန်ကြားရေးမှူး ဒေါက်တာ သန်းထိုက်က ဧရာဝတီကို အတည်ပြု ပြောသည်။

“ကျနော်တို့ဘက်က မဖျက်ရင် တရားစွဲမယ်။ ဖျက်သွားရင်တော့ မလုပ်တော့ဘူးပေါ့။ ဒါပေမယ့် အားလုံးပြီးတဲ့ အထိ စောင့်ကြည့်ရမှာ။ ဖျက်တာ အားလုံးပြီးတယ်၊ နဂိုမူလ အနေအထားတိုင်း ပြန်ဖြစ်တယ် ဆိုရင်တော့ မစွဲဘူး။ ဖျက်တာ တိုးလို့တန်းလန်း ဖြစ်နေတယ်၊ ဆက်မလုပ်ဘူးဆိုရင်တော့ (တရား) စွဲရမှာပေါ့” ဟု ၎င်းက ဆိုသည်။

ယင်းနေရာသည် ကာကွယ် ထိန်းသိမ်းထားသည့် ရှေးဟောင်းမြင်ကွင်း (Landscape) နှင့် ရှေးဟောင်း ဘုရား၊ ပုထိုး၊ စေတီများဖြစ်ရာ ဝိုင်းဝန်း ထိမ်းသိမ်းရမည် ဖြစ်ကြောင်း၊ ထိုသို့ ထိန်းသိမ်းရာ၌ ခတ်သစ် အဆောက်အအုံများ တိုးချဲ့ ဆောက်လုပ်ခြင်း ကိုသာမက ပုဂံခေတ်က မရှိခဲ့သည့် ရုပ်ဝတ္ထုပစ္စည်း (Material) များ အနီးဝန်းကျင်တွင် လာရောက် အသုံးပြုခြင်းက အစ ခွင့်ပြု၍ မရကြောင်း ဒေါက်တာ သန်းထိုက်က ရှင်းပြသည်။

အဆိုပါ ခြံဝန်းခတ်ထားသည့် နေရာသည် အမွေအနှစ် ထိန်းသိမ်းရေးဇုန် (Property Zone) ၌ ကျရောက်နေပြီး လွန်ခဲ့ သည့် နှစ်ပေါင်း ၉၀၀ ကျော်၊ ပုဂံခေတ် အနုပညာ လက်ရာများ မြင်တွေ့နိုင်သည့် စေတီ၊ ပုထိုး၊ ဘုန်းကြီးကျောင်းများ တည်ရှိနေဆဲ ဖြစ်သည်။

သံဇကာ ခြံစည်းရိုး ခတ်မှုမှာ ၃ လခန့်သာ ရှိသေးပြီး အဝန်းအဝိုင်းမှာ ပေ ၁၀၀ x ပေ ၈၀ ခန့်၊ မြေဧကအားဖြင့် ၅ ဧက ခန့် ကျယ်ဝန်းကြောင်း၊ အဆိုပါ မြေနေရာ၏ မူလပိုင်ရှင်သည် ပုဂံဒေသခံ မဟုတ်ဘဲ ရန်ကုန်မှ စီးပွားရေးလုပ်ငန်းရှင် တဦးဖြစ်ကာ တာမဏီကျောင်း ဆရာတော်၏ ဒါယိကာ၊ ဒါယိကာမများ ဖြစ်ကြောင်း ဒေသခံများထံမှ စုံစမ်း သိရှိရ သည်။

ပုဂံဒေသခံ ဦးမြင့်နိုင်က “ဖျက်လိုက်တာ ကောင်းတဲ့လက္ခဏာပါ။ အရင်တုန်းက ဥပဒေမဲ့ မြေယာတိုးချဲ့မှုတွေ အပေါ် မှာ အမြင်အမျိုးမျိုး ကွဲတာလေးတွေ ရှိပေမယ့် ဒါကတော့ တကယ့်ကို ညီညီညွတ်ညွတ်နဲ့ ဒေသခံ၊ ရှေးဟောင်းမြတ်နိုး တဲ့ အသိုင်းအဝိုင်း၊ ဝန်ကြီးဌာန အားလုံးက တက်ညီလက်ညီနဲ့ လုပ်လိုက်တဲ့သဘောပေါ့။ ဥပဒေ စိုးမိုးမှု ပြန်ရလာတယ်လို့ ခံစားရတယ်” ဟု မှတ်ချက်ပြုသည်။

ယခင်က နေရာတခု ယူပြီးပါက အဆင်ပြေပြီး ရသွားကြသည်မှာ များကြောင်း၊ ယခုဖြစ်ရပ်က ကျူးကျော်မှုများ ပြုလုပ် ၍ မရတော့ဘဲ ဥပဒေအတိုင်း၊ ဇုန်နယ်မြေခွဲခြားမှု အတိုင်း အတိအကျသွားနေပြီ ဆိုခြင်းကို လုပ်ငန်းရှင်များအား သ တင်း စကားပေးလိုက်ခြင်းသာ ဖြစ်ကြောင်း ၎င်းက ဆက်လက် ပြောဆိုသည်။

သို့သော်လည်း ပုဂံဒေသ အမွေအနှစ်ဇုန်သည် ကျယ်ပြန့်လွန်းခြင်း၊ လူနေအိမ်ခြေများနှင့် ရောထွေးနေခြင်းနှင့် ဥပဒေမဲ့ ကျူးကျော်မှုများက ကြီးမားသော စိန်ခေါ်မှု ဖြစ်နေသေးသည်ဟု ဦးမြင့်နိုင်က ပြောသည်။

ရှေးဟောင်းအမွေအနှစ် ထိန်းသိမ်းရေးပညာရှင် ဒေါ်ဥမ္မာမျိုးက ယခုဖြစ်ရပ်သည် သာသနာရေးဆိုင်ရာ သံဃာတော် များ အပါအဝင် လူတိုင်းသည် ကမ္ဘာ့အမွေအနှစ် စည်းမျဉ်းစည်းကမ်းများကို ပိုမိုနားလည်ရန် လိုကြောင်း၊ ကမ္ဘာ့အမွေ အနှစ်ဒေသအတွင်း အမွေအနှစ်များကို မထိခိုက်ဘဲ မည်သို့နေထိုင်ရမည်ကို အသိပညာပေးမှုများ ထပ်မံပြုလုပ်ရန် လိုအပ်ကြောင်း မီးမောင်းထိုးပြနေသည်ဟု မှတ်ချက်ပြုသည်။

ရှေး/သုဌာနအနေဖြင့် ဥပဒေမဲ့ ဆောက်လုပ်နေခြင်းကို ယခုမှ တားမြစ်ခြင်း မဟုတ်ဘဲ စတင်ဆောက်လုပ်စဉ်က တည်းက အကြိမ်ကြိမ်တားမြစ်ခဲ့သော်လည်း ဆက်လုပ်ခဲ့ခြင်း ဖြစ်ကြောင်း၊ နောက်ဆုံးအဆင့် တရားစွဲတော့မည်ဆိုမှ ပိုင်ရှင် ရောက်လာပြီး ပူးပေါင်း ပါဝင်ဆောင်ရွက်လာကြောင်း၊ လူသားအားလုံးနှင့် ဆိုင်သည့် ကမ္ဘာ့အမွေအနှစ်ကို အား လုံးက ဝိုင်းဝန်း ထိန်းသိမ်းရမည်ဖြစ်ကြောင်း ဒေါက်တာသန်းထိုက်က အသိပေးပြောဆိုသည်။

ယခုဖြစ်စဉ်နှင့် ပတ်သက်၍ World Heritage Center (ကမ္ဘာ့အမွေအနှစ် စင်တာ)က မေးမြန်းထားမှုအား မြေပြင် အခြေအနေ၊ ဌာန၏ လုပ်ထုံးလုပ်နည်း အဆင့်ဆင့်နှင့် အရေးယူဆောင်ရွက်ထားပုံများကို တင်ပြသွားရန်ရှိကြောင်း သိရသည်။

၂၀၁၉ ဇူလိုင်တွင် ကမ္ဘာ့ယဉ်ကျေးမှု အမွေအနှစ် စာရင်းဝင် အဖြစ် အသိအမှတ်ပြုခံခဲ့ရသည့် ပုဂံဒေသတွင် ယဉ်ကျေး မှု အမွေအနှစ်များကို နည်းအမျိုးမျိုးဖြင့် ထိခိုက်စေမည့် ဥပဒေမဲ့၊ စည်းကမ်းမဲ့ ခြံဝန်းခတ်ခြင်း၊ အဆောက်အအုံသစ် များ တိုးချဲ့ ဆောက်လုပ်ခြင်းတို့ကြောင့် ယဉ်ကျေးမှု အမွေအနှစ်များ ရေရှည်တည်တံ့ရေးအတွက် အန္တရာယ်ရှိ ကြောင်း အမွေအနှစ် ချစ်မြတ်နိုးသူများက သတိပေးလျက် ရှိသည်။

ဆက်စပ်ဖတ်ရှုရန်

ကမ္ဘာ့အမွေ ပုဂံဒေသအတွင်း ဥပဒေမဲ့ အဆောက်အအုံ တိုးချဲ့မှုများ ပြုလုပ်နေ

မြောက်ဦး ယဉ်ကျေးမှု နယ်မြေအတွင်း ကျူးကျော် နေထိုင်မှု များလာ ဟုဆို

ကိုဗစ်ပေးတဲ့ ပုဂံ ဒေသခံတွေရဲ့ သောက

The post ပုဂံရှေးဟောင်း တာမဏီဘုရားစု အနီး ခြံခတ်မှု ပြန်လည် ဖျက်သိမ်း appeared first on ဧရာဝတီ.

ရန်ကုန် – စစ်တွေ ကားလမ်းမပေါ် ပုဏ္ဏားကျွန်းမြို့အဝင် ကင်းချောင်းတံတားထိပ်သို့ လမ်းလုံခြုံရေး ကင်းလှည့်သည့် တပ်မ တော် စစ်ကြောင်းတခု ရောက်ရှိလာစဉ် ရီမုမိုင်း ၂ လုံး ပေါက်ကွဲသဖြင့် တပ်မတော်သားတချို့ ကျဆုံးပြီး ဒဏ်ရာ ရရှိများ လည်း ရှိကြောင်း တပ်မတော်မှ ပြောရေးဆိုခွင့်ရှိသူ ဗိုလ်မှူးချုပ် ဇော်မင်းထွန်းက ပြောသည်။

ယင်းပေါက်ကွဲမှု ဖြစ်စဉ် ပုဏ္ဏားကျွန်းမြို့ ဘက်မှ စစ်တွေဘက်သို့ ဆိုင်ကယ် စီးနင်းလာသူ အရပ်သား ၂ ဦးကိုလည်း ထိ ခိုက်မိပြီး ၁ ဦး သေဆုံးသွားခဲ့သည်။

ဗိုလ်မှူးချုပ် ဇော်မင်းထွန်းက“တပ်မတော်က ရန်ကုန်-စစ်တွေ လမ်းမကြီး လုံခြုံရေးအတွက် ကင်းလှည့်လည်ဖို့အတွက် လမ်းလျှောက်သွားနေတာ ဖြစ်တယ်။ အဲဒီအချိန်မှာပဲ အရပ်သား ၂ ဦးကလည်း ဆိုင်ကယ်နဲ့ ဖြတ်မောင်းလာတယ်။ အဲဒီမှာ ဖြစ်တာ”ဟု ရှင်းပြသည်။

ပုဏ္ဏားကျွန်းမြို့နယ်တွင် မိုင်းပေါက်ကွဲသည့် ဖြစ်စဉ်များမှာ မြို့ပေါ်တွင် ဖြစ်လေ့နည်းပြီး နယ်ဘက်တွင်သာ ဖြစ်ပေါ်လေ့ ရှိ ကြောင်း၊ ယခုအခါ မြို့အဝင်အထိ ရောက်ရှိလာသဖြင့် ယခုလို မဖြစ်ပွားစေချင်ကြောင်း ပုဏ္ဏားကျွန်းမြို့နယ် ပြည်နည် လွှတ်တော် ကိုယ်စားလှယ် ဦးအောင်သန်းတင်က ပြောသည်။

“မိုင်းဖြစ်စဉ်ကတော့ မှန်တယ်။ အရပ်သားတယောက် ဒဏ်ရာ ရတယ်။ တယောက်က ဆုံးသွားပြီ။ တပ်မတော်သားတွေ ကျ၊ မကျတော့ မသိဘူး။ ဒဏ်ရာရတဲ့ အရပ်သား တယောက်ကိုတော့ စစ်တွေကို ခေါ်သွားပြီ။ မိုင်းကတော့ ဘယ် က ထောင်မှန်းလည်း မသိဘူး။ ဘယ်က လုပ်လိုက်မှန်း မသိဘူး”ဟု ဦးအောင်သန်းတင်က ပြောသည်။

တပ်မတော်ကမူ ရက္ခိုင့် တပ်မတော် (AA) အဖွဲ့ ၏ လက်ချက်ဟု စွပ်စွဲထားပြီး ယခုနောက်ပိုင်းတွင် ကြီးမားသည့် မိုင်းအမျိုး အစားများကို တင်ဆင် အသုံးပြုလာ၍ လူ၊ ယာဉ်များကိုပါ ထိခိုက်ပျက်စီးမှု ကြီးမားလာကြောင်း ပြောသည်။

“သူတို့ အရင်ကတည်းက ရခိုင်ဝန်ကြီးချုပ်ရဲ့ ယာဉ်တန်းကို ရီမုနဲ့ တိုက်ခိုက်ဖူးပါတယ်။ အခု နောက်ပိုင်းမှာ အိန္ဒိယ တပ်မ တော်က ဒီဘက်ကို သတင်းပေးတဲ့အခါမှာ အိန္ဒိယ သတင်းစာ တချို့ မှာလည်း ရေးခဲ့တာ ရှိတယ်။ AA အနေနဲ့ ရီမု နည်းပ ညာနဲ့ ပတ်သက်ပြီးတော့ကျ နည်းပညာမြင့်တဲ့ဆီက အထောက်အပံ့ ရရှိထားတယ်”ဟု ဗိုလ်မှူးချုပ် ဇော်မင်းထွန်း က ပြောသည်။

AA အဖွဲ့ အသုံးပြုသည့် နည်းပညာများထဲတွင် ရီမုခလုတ်ကို နှိပ်၍ ခွဲလို့ရသည့် နည်းပညာ၊ လမ်းလျှောက်စကားပြောစက် ဖြင့် ခွဲလို့ရသည့် နည်းပညာ၊ ယခုနောက်ပိုင်း ဝိုင်ဖိုင်ချိတ်၍ ခွဲလို့ရသည့် နည်းပညာတို့ပါ ရှိလာသဖြင့် အိန္ဒိယနိုင်ငံ၏ သတင်းစကားမှာ မှန်ကန်ကြောင်း ဆိုသည်။

ယခု ဖြစ်စဉ်နှင့် ပတ်သက်၍ AA အဖွဲ့ ထံမှ လွတ်လပ်သည့် သဘောထား ရရှိနိုင်ခြင်း မရှိသေးပါ။ သို့သော် ယခင် မိုင်းဖြစ် စဉ်များတွင် AA က ၎င်းတို့အဖွဲ့ ၏ လက်ချက်ဖြစ်ကြောင်း ဝန်ခံပြောဆိုလေ့ ရှိသည်။

ပြီးခဲ့သည့် ၂၀၁၉ ခုနှစ်၊ နိုဝင်ဘာလက ရခိုင်ပြည်နယ်၊ ကျောက်တော်မြို့နယ်တွင် တပ်မတော် စစ်ကြောင်းတခုအား မိုင်းခွဲ တိုက်ခိုက်မှုတွင် အမှတ် (၃၇၄) တပ်ရင်းမှ ဒုတိယ ဗိုလ်မှူးကြီး ရန်နောင်ဝင်း အပါအဝင် တပ်ဖွဲ့ဝင် တချို့ ကျဆုံးခဲ့ သည့် ဖြစ်စဉ်တွင် AA အဖွဲ့ က ၎င်းတို့လက်ချက်ဖြစ်ကြောင်း ဝန်ခံပြောဆိုခဲ့သည်။
စစ်ရေးလေ့လာသုံးသပ်သူ စာရေးဆရာ ဦးသန်းစိုးနိုင်က AA အဖွဲ့က ယခုလို နည်းပညာ မြင့်လာခြင်းသည် ကြီး ကျယ်သည့် ကိစ္စတခု မဟုတ်ဘဲ နိုင်ငံတခုခု၏ အကူအညီကို ရရှိနေသဖြင့် ယခုလို ဆောင်ရွက် နိုင်ခြင်း ဖြစ်ကြောင်း ပြောသည်။

ဦးသန်းစိုးနိုင်က “ဒီရီမုမိုင်းတွေ တွင်တွင်ကျယ်ကျယ် သုံးလာရင် လူထုကို ထိခိုက်နစ်နာမှုတွေလည်း ပိုများလာနိုင်တယ်။ ဒါက အတော်အန္တရာယ်ရှိတဲ့ အနေအထားတရပ်လို့ ပြောလို့ရတယ်။ ဒီမိုင်းတွေကလည်း AA က မလုပ်နိုင်ပါဘူး။ နိုင်ငံတနိုင်ငံက ပေးတာပဲ ဖြစ်မှာ”ဟု ပြောသည်။

ထို့ပြင် မြောက်ပိုင်းလက်နက်ကိုင် အဖွဲ့ များထဲတွင် တရုတ်နိုင်ငံထုတ် လေယာဉ်ပစ် ပုခုံးထမ်း လက်နက်များ တွေ့ ရှိစဉ် ကတည်းက ယခုလို ရီမုမိုင်း နည်းပညာလောက်ကို မအံ့သြမိတော့ဟု ဆိုသေးသည်။

တပ်မတော်က ရန်ကုန်-စစ်တွေ ကားလမ်းမပေါ်တွင် တူးဖော်ရရှိခဲ့သည့် မိုင်းတချို့ မှာ အမြင့် ၁ ပေနှင့် အချင်းပတ်လည် ၁ ပေနီးပါး အထိ ရှိကြောင်း၊ ယခုနောက်ပိုင်းတွင် လက်လုပ်မိုင်းများသည်လည်း ယခင်ကထက် အရွယ်အစား ပိုကြီး လာကြောင်း တပ်မတော် ပြောရေးဆိုခွင့်ရှိသူများက ပြောသည်။

ရခိုင်ပြည်နယ် မြောက်ပိုင်းတွင် မြေမြုပ်မိုင်း နင်းမိသဖြင့် အရပ်သား ထိခိုက်ဒဏ်ရာ ရရှိမှု၊ သေဆုံးမှုများ ရှိနေဆဲ ဖြစ်ပြီး အရပ်သား သေဆုံးသည့် ဖြစ်စဉ်တိုင်းတွင် တပ်မတော်နှင့် AA ၂ ဖွဲ့ စလုံးက ၎င်းတို့ လက်ချက်ဟု ဝန်ခံပြောဆိုမှုမျိုး တခါမှ မရှိခဲ့ဖူးပါ။

မိုင်းအန္တရာယ် အသိပညာပေး လုပ်ငန်းအဖွဲ့၏ စာရင်းပြုစုချက်များ အရ ၂၀၁၉ ခုနှစ်အတွင်း ရခိုင်ပြည်နယ် မြောက်ပိုင်း တွင် မိုင်းနင်းမိသည့် အရပ်သား ၅၈ ဦး ရှိပြီး ထိုအထဲမှ ၁၉ ဦးမှာ အသက်သေဆုံးခဲ့သည်။ ၂၀၂၀ ခုနှစ်ထဲတွင် မိုင်းနင်း မိသူ မည်မျှရှိကြောင်း မသိရှိရသေးပါ။

လက်ရှိ အချိန်အထိ အစိုးရနှင့် AA တို့ကြားတွင်လည်း ငြိမ်းချမ်းရေးအတွက် သဘောတူညီမှု တစုံတရာ မရရှိသည့် အပြင် AA ကို အစိုးရက အကြမ်းဖက် အဖွဲ့ အဖြစ် သတ်မှတ်လိုက်သဖြင့် ရခိုင်မြောက်ပိုင်းတွင် တိုက်ပွဲများ ပိုမိုပြင်းထန်လျက် ရှိသလို အရပ်သား သေဆုံး ထိခိုက်မှုများမှာလည်း နေ့စဉ် ဆက်တိုက် ဖြစ်ပွားနေသည်။

You may also like these stories:

မန္တလေး- စစ်တွေယာဉ်လိုင်းမှ ခရီးသည် ၃၁ဦးကို မြောက်ဦးအနီး AA ဖမ်းဆီးဟုဆို

AA အဖွဲ့ဝင်ဟု သံသယ ရှိသဖြင့် အရပ်သား ၂၅ဦးကို ထိန်းသိမ်းထား

AA ဖမ်းဆီးထားသည့် ပလက်ဝ ဒေသခံ ၁၂ ဦး ထွက်ပြေး လွတ်မြောက်

The post ရီမုမိုင်းဖြင့် တိုက်ခိုက်ခံရသဖြင့် ပုဏ္ဏားကျွန်းအဝင်တွင် တပ်မတော်သားတချို့ ကျဆုံး appeared first on ဧရာဝတီ.

COVID-19 ကြောင့် ထိခိုက်မှုများ ဖြစ်ပေါ်လာနိုင်သည့် စီးပွားရေး လုပ်ငန်းများကို ကုစားရန် လုပ်ငန်းရှင်များကို ချေးငွေ ထုတ်ပေးရာတွင် လုပ်ငန်းပေါင်း ၁ ထောင်ကျော်ကို အစိုးရက ကျပ် ၃၆ ဘီလီယံကျော် အထိ ထုတ်ချေးပေးထားကြောင်း ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေး ဝန်ကြီးဌာနက သိရသည်။

ထိုချေးငွေကို နိုင်ငံတော် လှည့်ပတ် ရန်ပုံငွေမှ ကျပ်ဘီလီယံ ၅၀ နှင့် လူမှုဖူလုံရေး ရန်ပုံငွေမှ ကျပ် ဘီလီယံ ၅၀ စုစုပေါင်း ကျပ် ဘီလီယံ ၁၀၀ အား COVID-19 Fund အဖြစ် မြန်မာ့စီးပွားရေးဘဏ်တွင် ထူထောင်ထားခြင်း ဖြစ်သည်။

အဆိုပါ နိုင်ငံတော် လှည့်ပတ် ရန်ပုံငွေ ကျပ် ၁၀၀ ဘီလီယံထဲမှ ပထမအသုတ် ချေးငွေကို ဧပြီလ ၉ ရက်မှ စတင်၍ စီးပွား ရေး လုပ်ငန်းရှင် ၈၅ သို့လည်းကောင်း၊ ဒုတိယ အသုတ် ချေးငွေကို လုပ်ငန်း ၁၁၃ ဦးသို့ လည်းကောင်း၊ တတိယအသုတ် ချေးငွေကို လုပ်ငန်း ၁၁၁ ခုသို့ လည်းကောင်း၊ စတုတ္တသုတ် ချေးငွေကို လုပ်ငန်း ၄၁၇ ခု သို့ လည်းကောင်း ယခု ဇွန်လ ၂ တွင် ထုတ်ပေးမည့် ပဉ္ဓမသုတ် ချေးငွေကို လုပ်ငန်း ၂၉၀ ခုကို စုစုပေါင်း ကျပ် ၃၆ ဘီလီယံ ကျော် ထုတ်ချေးပေးလိုက် ခြင်း ဖြစ်ကြောင်း ထုတ်ပြန်ချက်များ အရ သိရသည်။

ချေးငွေ ထုတ်ယူခွင့် ရရှိသူများအနေနှင့် မြန်မာ့ စီးပွားရေးဘဏ်မှ ဘဏ်လုပ်ထုံး လုပ်နည်းများနှင့်အညီ စိစစ်၍ ချေးငွေ များ ထုတ်ပေးမည်ဖြစ်ပြီး ကျန်ရှိသည့် လုပ်ငန်းရှင်များ၏ လျှောက်လွှာများကိုလည်း ဆက်လက် ထုတ်ပေးနိုင်ရန် ဆောင် ရွက်လျက်ရှိကြောင်း COVID-19 ကြောင့် ဖြစ်ပေါ်လာနိုင်သည့် စီးပွားရေး သက်ရောက်မှုများအပေါ် ကုစားရေး လုပ်ငန်း ကော်မတီ (MIFER) က ထုတ်ပြန်ထားသည်။

သို့သော် ချေးငွေ ရရှိသူများအား ဘဏ်လုပ်ထုံးလုပ်နည်းများနှင့်အညီ စိစစ်၍ ထုတ်ပေးရာတွင် ဘဏ်တခုခု၌ တရားစွဲဆို ခံထားရသော လုပ်ငန်းဖြစ်ပါက ချေးငွေ ထုတ်ပေးမည် မဟုတ်ကြောင်း ဇွန်လ ၂ က ထုတ်ပြန်သော ပဉ္ဓမသုတ် ချေးငွေ ထုတ်ပြန်ချက်၌ ဖော်ပြထားသည်။

အသေးစားနှင့် အလတ်စား (MSME) လုပ်ငန်းများ ဖြစ်သော စားသောက်ကုန် လုပ်ငန်းများ၊ ကုန်ထုတ်လုပ်မှု လုပ်ငန်း များနှင့် လက်ခစား (CMP) လုပ်ငန်းများ၊ ဟိုတယ်နှင့် ခရီးသွား လုပ်ငန်းများအပြင် မွေးမြူရေး လုပ်ငန်းများ၊ ဝန်ဆောင်မှု လုပ်ငန်းများ၊ ပညာရေးလုပ်ငန်းများနှင့် သယ်ယူပို့ဆောင်ရေး လုပ်ငန်းများကို ချေးငွေ ထုတ်ပေးနေခြင်း ဖြစ်သည်။

ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေး ဝန်ကြီးဌာန တာဝန်ရှိသူတဦးက “ကျနော်တို့က အကြောင်းကြားတဲ့ စာ တွေကို UMFCCI ကို ပေးလိုက်တယ်။ အဲဒါတွေကို လုပ်ငန်းရှင်တွေက UMFCCI မှာထုတ်ရတယ်။ ကုမ္ပဏီ တခုချင်းစီရဲ့ အကြောင်းကြားစာကို ဆိုင်ရာဆိုင်ရာ တိုင်းဒေသကြီးတွေကို ပို့ပေးလိုက်တာ။ မန္တလေးမှာ ရှိတဲ့သူက မန္တလေးမှာ ထုတ် ရန်ကုန်မှာရှိတဲ့ လုပ်ငန်းက ရန်ကုန်မှာထုတ်ရပါတယ်”ဟု ဧရာဝတီသို့ ပြောသည်။

၎င်းကဆက်၍ “ထုတ်ပေးလိုက်သည့် ချေးငွေတွေကို လုပ်ငန်းရှင်တွေက အမှန်တကယ် ဝန်ထမ်းလစာအတွက် သုံးလား မသုံးလား ဆိုတာတော့ စစ်ဆေးဖို့ လုပ်ဖို့တော့ ပြောထားတာရှိတယ်။ လူကြီးတွေမှ သိမယ်။ အဓိက တော့ ချေးငွေက အဲဒီအတွက် ပေးတာဖြစ်တယ်။ ဒါကြောင့် အဲ့ဒါတော့ သုံးရမယ်ထင်တယ်” ဟု ပြောသည်။

အစိုးရမှ ချေးပေးသော ချေးငွေ၏ အတိုးနှုန်းမှာ ၁ ရာခိုင်နှုန်း ဖြစ်ပြီး ချေးငွေ ကာလမှာ ၁ နှစ် သတ်မှတ်ထားကာ ချေးငွေ စတင် လျှောက်ထားခွင့်ရသည့် အချိန်မှ လက်ရှိအချိန်အထိ ချေးငွေ လျှောက်ထားသူများအနက် လျှောက်လွှာ ၄၀၀၀ နီး ပါးကို စီးပွားရေး သက်ရောက်မှုများ အပေါ် ကုစားရေး လုပ်ငန်း ကော်မတီ၏ လုပ်ငန်းအဖွဲ့ (Task Force) နှင့် မြန်မာနိုင်ငံ လက်မှတ်ရ ပြည်သူ့ စာရင်းကိုင်များ အသင်းသို့ တင်ပြထားကြောင်း မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်း ရှင်များ အသင်းချုပ် (UMFCCI) မှ သိရသည်။

UMFCCI တွဲဖက်အတွင်းရေးမှူး ဦးအေးထွန်း က “ချေးငွေက ထုတ်တော့ ထုတ်ပေးနေပါတယ်။ ဒါပေမယ့် ချေးငွေ ရဖို့ အဆင့် တဆင့်ကတော့ ဘဏ်နဲ့ စာချုပ် ချုပ်ရပါတယ်။ ဘဏ်ကို လိုအပ်တဲ့ စာရွက်စာတမ်းတွေ ပြင်ဆင်ရတာ လက်မှတ် ထိုးရတာတွေ ရှိတယ်။ တော်တော်များများတော့ လာထုတ်ပြီးသွားပြီ”ဟု ဧရာဝတီသို့ ပြောသည်။

ဆက်လက်၍ ၎င်းက “ငွေချေးတဲ့အခါ ကုမ္ပဏီအနေနဲ့ ချေးတယ်ဆိုရင် ဒါရိုက်တာ အဖွဲ့ဝင်တွေ ရှိတယ်။ အဲဒီ အဖွဲ့ဝင်တွေ က လက်မှတ်ထိုးတာတွေ ဘာတွေ လုပ်တယ်။ ဒါတွေပြည့်စုံရင်တော့ ရမှာပေါ့။ တချို့သော သူတွေကတော့ ဒီကနေ လာထုတ်သွားပေမယ့် ဟိုဘက်မှာ လက်မှတ်သွားထိုးဖို့တွေ ရှိတယ်” ဟု အခြေအနေကို ရှင်းပြသည်။

ယခု ထုတ်ပေးနေသည့် ချေးငွေ ၅ ကြိမ်တွင် လုပ်ငန်းရှင် ၁ ထောင်ကျော်ကိုသာ ရှိသေးသဖြင့် နောက်ထပ်ချေးငွေများ ထုတ်ပေးရန် လုပ်ငန်းရှင် တော်တော်များများလည်း ကျန်နေသေးကြောင်း ဦးအေးထွန်းက ပြောသည်။

လုပ်ငန်းရှင် တဦးလည်းဖြစ်သည့် ဦးအေးထွန်း က “ဒါက ကိုဗစ်ချေးငွေ ဖြစ်တဲ့အတွက် နိုင်ငံတော်ဘက်က အမြန်ပေးနေတဲ့ အခြေအနေမျိုး ရှိပါတယ်။ ကိုဗစ်ကာလမှာ စီးပွားရေးကုစားဖို့ အတွက်ကို မြန်မြန်လေးယူပြီးတော့ မြန်မြန်လေး လုပ်ငန်းတွေကို လည်ပတ်နိုင်အောင် လုပ်ရမယ်။ မြန်မြန်လေး ဝန်ထမ်းတွေနဲ့ အလုပ်အကိုင် ခန့်ထားနိုင်ရေး လုပ်ရမယ်”ဟု ဆိုသည်။

အစိုးရ ချေးငွေရရှိသော လုပ်ငန်းရှင်များအနေနှင့် လက်တွေ့တွင် ချေးငွေကို နိုင်ငံတော်မှ သတ်မှတ်ထားသည့် ပုံစံအတိုင်း အသုံးပြုခြင်း ရှိ၊ မရှိကို စစ်ဆေးသွားရန် အစီစဉ်ရှိသော်လည်း လက်ရှိတွင် စစ်ဆေးခြင်း မရှိသေးကြောင်း ရင်းနှီးမြှုပ်နံှမှုနှင့် နိုင်ငံခြား စီးပွားဆက်သွယ်ရေး ဝန်ကြီးဌာနက သိရသည်။

လုပ်ငန်းရှင်များ၏ ချေးငွေလျှောက်လွှာ စိစစ်လက်ခံပေးသော သူလည်းဖြစ်သူ ဦးအေးထွန်းက “စစ်ဆေးသွားဖို့တော့ ကျနော်တို့မှာ တာဝန်မရှိပါဘူး။ UMFCCI အနေနဲ့က အဓိကတော့ ကျနော်တို့က ချေးငွေ လက်ခံပေးတယ်။ ဝိုင်းဝန်းပြီး တော့ စိစစ်ပေးတယ်။ အဲဒါပြီးတာနဲ့ ကျနော်တို့က နောက်ထပ် အထပ် အဆင့်တွေ ဖြစ်တဲ့ Task Force တို့ စာရင်းကိုင် အသင်းတို့ကို တင်ပေးတယ်။ သူတို့ကနေ ဆုံးဖြတ်တာပါ”ဟု ရှင်းပြသည်။

လက်ရှိတွင် UMFCCI မှ ချေးငွေ လျှောက်လွှာ သုံးထောင်ကျော် ပို့ထားပြီး ကျန်ရှိနေသေးသည့် လျှောက်လွှာများအတွက် လည်း Task Force မှ ဆက်လက် ညွှန်ကြားလာပါက ထပ်မံပို့ဆောင်သွားရန် ရှိကြောင်း သိရသည်။

ယခုသတင်းအား AYA Bank မှ ကူညီပံ့ပိုးသည်။

ဆက်စပ်ဖတ်ရှုရန်

COVID-19 အတွက် အစိုးရက ကျပ်ဘီလီယံ ၁၇၀၀ ကျော်ထိ အသုံးပြုနေ

COVID-19 အလွန် စိုက်ပျိုးရေးကဏ္ဍ ပြန်ထူထောင်နိုင်ရေး ကန်ဒေါ်လာ သန်း ၂၀၀ ချေးမည်

စတုတ္တအကြိမ်မြောက် အစိုးရချေးငွေ တိုင်းနှင့်ပြည်နယ် လုပ်ငန်းရှင်များကို ဦးစားပေးမည်

The post စီးပွားရေး လုပ်ငန်း ၁ ထောင်ကျော်ကို အစိုးရ ကျပ် ၃၆ ဘီလီယံကျော် ထုတ်ချေး appeared first on ဧရာဝတီ.

ကမ္ဘာ့ကပ်ရောဂါ COVID-19 ရောဂါ အခြေအနေ တည်ငြိမ်မှု မရှိသေးခြင်းနှင့် ခရီးသည် စီးနင်းမှု ပုံမှန် ပြန်မဖြစ်သေးခြင်း တို့ကြောင့် YBS ယာဉ်လိုင်းများ အနေဖြင့် ဇူလိုင်လမှသာ ပုံမှန်အစီးရေအတိုင်း ပြန်ပြေးဆွဲနိုင်မည် ဖြစ်ကြောင်း YBS ကုမ္ပဏီများထံက သိရသည်။

လက်ရှိအချိန် ဇွန်လ ၁ ရက်မှ စတင်ကာ ရန်ကုန်မြို့ရှိ ရုံးများ၊ အလုပ်ရုံ အားလုံးနီးပါး ပုံမှန်အတိုင်း ပြန်လည် ဖွင့်လှစ်လာ ပြီ ဖြစ်သော်လည်း ခရီးသည် စီးနင်းမှုသည် ကိုဗစ် မတိုင်မီကထက် သုံးပုံတပုံခန့်သာ ရှိနေခြင်းကြောင့် ယာဉ်လိုင်းများရှိ ယာဉ်အစီးရေ၏ ၃၀ ရာခိုင်နှုန်းမှ ၅၀ ရာခိုင်နှုန်းခန့်သာ ပြေးဆွဲနိုင်လျက် ရှိသည်။

လူထုမိတ်ဆွေ ပြည်သူ့ အကျိုးပြုယာဉ်လိုင်း၏ Operation Director ကိုတရုတ်လေးက “အခုကာလက ယာဉ်တစီး ထွက် လို့ အမြတ်မပြောနဲ့ တနေ့ လုပ်ငန်းလည်ပတ်ငွေတောင် မရတဲ့အတွက် ကားတွေ ထွက်ဖို့က အကျိုးအမြတ် မရရင်တော့ နားနေရဦးမှာပဲ” ဟု ဧရာဝတီသို့ ပြောသည်။

ယခင်က ယာဉ်တစီး၏ တနေ့ ဝင်ငွေသည် ကျပ် ၈ သောင်းကျော်မှ တသိန်း နီးပါးအထိ ရှိသော်လည်း လတ်တလောတွင် ကျပ် ၄ သောင်းကျော်သာရှိတော့၍ လုပ်ငန်း လည်ပတ်မှု စရိတ်ပင် တွက်ချေ မကိုက်သောကြောင့် ကုမ္ပဏီရှိ ယာဉ်အစီး ရေ ၅၀ ရာခိုင်နှုန်းအောက်သာ ပြေးဆွဲလျက် ရှိသေးကြောင်း ၎င်းက ဆိုသည်။

ကိုဗစ်ကာလ မတိုင်ခင်တွင် YBS ယာဉ်လိုင်းများကို စီးနင်းသည့် ခရီးသည်ဦးရေသည် ၁ ရက်လျှင် ၁၈ သိန်းကျော်အထိ ရှိပြီး ယခု ၁ ရက်လျှင် လူဦရေ ၅ သိန်းခန့်က ရှိတော့ကြောင်း ရန်ကုန်တိုင်းဒေသကြီး အများပြည်သူ သယ်ယူပို့ဆောင် ရေး ကြီးကြပ်မှု အာဏာပိုင်အဖွဲ့ (YRTA) ၏ စာရင်းများအရ သိရသည်။

မြို့တွင်းပတ် YBS ယာဉ်လိုင်းများအပါအဝင် ယာဉ်လိုင်း ၉ လိုင်းအထိ ပြေးဆွဲနေသော Omni Focus ကုမ္ပဏီ အနေဖြင့် လည်း လက်ရှိအချိန်တွင် YBS ယာဉ်လိုင်း ၅၆ နှင့် လှိုင်သာယာ-ဆူးလေသို့ ပြေးဆွဲနေသော YBS ၂၀ တို့ကိုသာ ပြေးဆွဲ လျက်ရှိပြီး ယင်းယာဉ်လိုင်းများပင်လျှင် ယာဉ်အစီးရေ အပြည့်အဝ ပြေးဆွဲနိုင်ခြင်း မရှိသေးကြောင်း အဆိုပါကုမ္ပဏီ၏ အုပ်ချုပ်မှု ဒါရိုက်တာ ဦးထွန်းတောက်ဝင်းက ဧရာဝတီသို့ ပြောသည်။

၎င်းက “ကျနော်တို့လည်း နောက်ထပ် လူစီးများလာနိုင်တဲ့ လမ်းကြောင်းတွေကိုလည်း ထပ်ပြီး ပြေးဆွဲသွားဖု့ိတော့ စီစဉ် နေတယ်။ ဒါပေမဲ့ ဒီရောဂါအခြေအနေက ဘယ်လောက်ထိ သွားမလဲ မသိသေးတော့ ပုံမှန်အတိုင်း ပြန်ဖြစ်ဖို့က ပြောရ ခက်နေသေးတယ်။ ခရီးသည် ထွက်ရှိမှုကလည်း ရုံးတွေပြန်ဖွင့်ပြီ ဆိုတာတော့ မှန်ပါတယ်။ ဒါပေမယ့် အရင်တုန်းက လောက်တော့အထိ ပြန်ဖြစ်မသေးပါဘူး” ဟု ဆိုသည်။

လက်ရှိအချိန်တွင် YBS ယာဉ်လိုင်းများ အနေဖြင့် ခရီးသည် ထွက်ရှိမှုများသော ရုံးဆင်း ရုံးတက် အချိန်များကိုပင် အဓိက ပြေးဆွဲနေရပြီး ခရီးသည် စီးနင်းမှု နည်းပါးသော နေ့လယ်ပိုင်းနှင့် ရုံးဆင်းချိန် နောက်ပိုင်း အချိန်များကို ယာဉ်ပြေးဆွဲမှုများ လျှော့ချ ပြေးဆွဲလျက် ရှိကြောင်း သိရသည်။

ယင်းသို့ YBS ယာဉ်လိုင်းများက ယာဉ်ပြေးဆွဲမှုများ လျှော့ချထားလျက် ရှိသေးသည် ဟုဆိုကြသော်လည်း ဇွန်လ၂ ရက် စာရင်းအရ YBS ယာဉ်အစီးရေ ၃၅၀၀ ဝန်းကျင်အထိ ပြေးဆွဲခဲ့ပြီး ယင်းပမာဏသည် ပုံမှန်ချိန်က ပြေးဆွဲပေးခဲ့သော ယာဉ်အစီးရေ၏ ၇၉ ရာခိုင်နှုန်းအထိပင် ရှိနေကြောင်း YRTA ၏ အတွင်းရေးမှူး ဦးလှအောင်က ဧရာဝတီသို့ ပြောသည်။

၎င်းက ဆက်လက်၍ “အခုလက်ရှိ ယာဉ်ထွက်ရှိမှု နဲ့ ခရီးသည် ထွက်ရှိမှု အချိုးနဲ့ ပြန်ယှဉ်ကြည့်လိုက်ရင် ကြပ်တည်းတဲ့ အခြေအနေ မရှိပေမယ့် ရုံးတက်ရုံးဆင်းချိန်မှာတော့ ကြပ်တည်းနေပါတယ်။ ကျနော်တို့တွေကလည်း ခရီးသည်ပြည်သူ တွေရဲ့ သွားလာမှု အခြေအနေပေါ် မူတည်ပြီးတော့ ပြေးဆွဲဖို့ကို ညွှန်ကြား ဆောင်ရွက်နေပါတယ်” ဟု ဆိုသည်။

YBS ယာဉ်လိုင်းများသည် ပြေးဆွဲစရိတ်များ၊ စီမံခန့်ခွဲမှု စရိတ်များ အခက်အခဲဖြစ်နေသည့်အတွက် CNG ဈေးနှုန်းများ လျှော့ချပေးရန် အစိုးရသို့ တင်ပြထားသော်လည်း လက်ရှိအချိန်ထိ ဆောက်ရွက်ပေးခြင်းမျိုး မရှိသေးကြောင်း ဦးလှ အောင်က ပြောသည်။

ရုံးတက်ရုံးဆင်းချိန်များကို YBS ယာဉ်များ အဓိက ပြေးဆွဲလျက် ရှိသော်လည်း ယာဉ်အစီးရေ အပြည့်အဝ မဟုတ်သည့် အတွက် ထိုအချိန်များတွင် ခရီးသည်များသည် ကြပ်ကြပ်တည်းတည်း စီးနင်းနေရလျက် ရှိပြီး ရုံးဆင်းချိန် နောက်ပိုင်း အချိန်များတွင်လည်း ကြားကားများကို အသုံးပြုနေကြရလျက် ရှိသည်။

ဆူးလေမှ မြောက်ဒဂုံမြို့နယ်သို့ ပြန်သည့် ကိုအောင်မြင့်အေးက “ကားဂိတ်မှာ ကားလာဦးမလား၊ မလာဘူးဆိုတာ အရင် ကဆိုရင် ဂိတ်မှူး ရှိသေးလား မရှိဘူးလား ကြည့်တာနဲ့ သိတယ်။ အခုက ရုံးနောက်ကျလို့ ၇ ခွဲလောက်ဆိုရင် ကားမပြောနဲ့ ဂိတ်မှူးတောင် မရှိတော့ဘူး” ဟု ပြောသည်။

လက်ရှိအချိန်တွင် လုပ်ငန်းခွင်များသည် ပုံမှန်အတိုင်း ပြန်လည် ဖွင့်လှစ်လာပြီ ဖြစ်ခြင်းကြောင့် YBS ယာဉ်လိုင်းများ၏ ခရီးစဉ်ပြေးဆွဲမှု အချိန်များကို ပုံမှန်အတိုင်း မဖြစ်နိုင်သေးသည် နားလည်သော်လည်း အချိန်အနည်းငယ် ထပ်တိုး ပြေးပေး စေလိုကြောင်း ၎င်းက ပြောဆိုသည်။

ရန်ကုန်မြို့တွင် COVID-19 ကူးစက် ပြန့်ပွားမှု မဖြစ်စဉ်က ၁ ရက်လျှင် YBS ကားအစီးရေ ၄၅၀၀ ခန့် ပြေးဆွဲပြီး ခရီးသည် ဦးရေသည် ၁၈ သိန်းကျော် အထိ ရှိသည်။

ယခုသတင်းအား AYA Bank မှ ပံ့ပိုးကူညီသည်။

ဆက်စပ်ဖတ်ရှုရန်

YBS ကားများကို ဝန်ထမ်း ကြို၊ ပို့ ယာဉ်များ အဖြစ် ငှားရန် အတိုင်ပင်ခံထံသို့ တင်ပြ

COVID -19 ကြောင့် ရန်ကုန်မြို့သယ်ယူ ပို့ဆောင်ရေး ဝန်ဆောင်မှုများ လျှော့ချ

YBS များ မှန်တံခါးဖွင့် မောင်းရန် ညွှန်ကြား

The post YBS ယာဉ်များ ဇူလိုင်လမှသာ ပုံမှန်အစီးရေ ပြန်လည် ပြေးဆွဲနိုင်မည် appeared first on ဧရာဝတီ.

ရခိုင်ပြည်နယ်မြောက်ပိုင်း မင်းပြားမြို့နယ်တွင် ရက္ခိုင်စစ်တပ် (AA) ၏ ဖမ်းဆီးမှုခံခဲ့ရပြီး ပြန်လွတ်လာသည့်နောက် သေဆုံးသွားသည့် အမျိုးသမီး၏ ဖြစ်စဉ်ကို လူ့အခွင့်အရေးအဖွဲ့များထံ စာပို့ အကြောင်းကြားသွားမည်ဟု ရခိုင်ပြည်နယ် အတွင်းရှိ ချင်းတက္ကသိုလ်ကျောင်းသား/သူများအဖွဲ့ (CUSR) က ပြောသည်။

သေဆုံးသွားသည့် အမျိုးသမီးမှာ အသက် ၄၈ နှစ်အရွယ် ဒေါ်စိန်မဦး ဖြစ်ပြီး မင်းပြားမြို့နယ် သိုင်းကျပ်ကျေးရွာမှ ချင်း အမျိုးသမီးတဦး ဖြစ်သည်။

၎င်းသည် မေ ၃ ရက်က အခြားအမျိုးသား ၃ ဦးနှင့် အတူ ဖမ်းဆီးခံခဲ့ရပြီး ဇွန် ၁ ရက်တွင် ပြန်လွှတ်ပေးလိုက်သဖြင့် လွတ်မြောက်လာခြင်း ဖြစ်သည်။

လွတ်လာပြီးနောက် စိတ်ကယောင်ခြောက်ခြား ဖြစ်ခြင်း၊ ကြောက်လန့်ခြင်းများ၊ အသက်ရှုမဝခြင်းများ ဖြစ်နေသဖြင့် မင်းပြားမြို့နယ် ဆေးရုံသို့ မိသားစုဝင်များက ပို့ဆောင်ပြီး ဇွန် ၂ ရက် မနက်ပိုင်း၌ သေဆုံးသွားခြင်း ဖြစ်သည်ဟု သိရသည်။

CUSR ၏ ဥက္ကဋ္ဌ ဆလိုင်းထွန်းလှကျော်က “အဓိက ကတော့ အခု ဖြစ်နေတာ သူတယောက်တည်း မဟုတ်ဘူး။ ရခိုင် ပြည်နယ်မှာ တိုင်းရင်းသား လူမျိုးစုဖြစ်တဲ့ ကျနော်တို့ ချင်းတွေ လူ့အခွင့်အရေး ချိုးဖောက်ခံရတာ အများကြီး ရှိပါ တယ်။ ပြန်လွတ်လာတယ်၊ မပြောရဲဘူး။ တချို့လုံးဝကို ပျောက်သွားတယ်။ ဒါကို ကျနော်တို့က ရခိုင်ပြည်နယ်ထဲက ချင်းတွေ လူ့အခွင့်အရေး ချိုးဖောက်ခံနေရပါတယ် ဆိုတာကို တင်ပြမယ်လို့ စီစဉ်ထားပါတယ်” ဟု ပြောသည်။

CUSR မှ ပြည်တွင်း အခြေစိုက် ချင်းလူ့အခွင့်အရေးအဖွဲ့ (CHRO) ထံသို့ မြေပြင်မှ အချက်အလက်များကို ပေးပို့သွား မည် ဖြစ်သည်ဟုလည်း ဆလိုင်းထွန်းလှကျော်က ဆိုသည်။

ချင်းလူ့အခွင့်အရေး အဖွဲ့သည် ၁၉၉၅ ခုနှစ်က စတင်ဖွဲ့စည်းထားခြင်း ဖြစ်ကာ အမေရိကန်နှင့် ကနေဒါတွင် တရားဝင် မှတ်ပုံတင်ထားပြီး အစိုးရ မဟုတ်သည့် အဖွဲ့အစည်း ဖြစ်သည်။

မြန်မာနိုင်ငံတွင်း ချင်းလူမျိုးများ၏ လူ့အခွင့်အရေး အခြေအနေများကို စောင့်ကြည့်လေ့လာခြင်း၊ မှတ်တမ်းပြုလုပ်ခြင်း များအပြင် ဒေသတွင်း အခြေအနေများကိုလည်း နိုင်ငံတကာ လူ့အခွင့်အရေး အဖွဲ့များသို့ ပေးပို့ကာ ချိတ်ဆက် ဆောင်ရွက် နေသည့် အဖွဲ့ ဖြစ်သည်။

၂၀၁၈ ခုနှစ်မှစ၍ ကုလသမဂ္ဂ လူမှုစီးပွားရေး ကောင်စီ (ECOSOC) ၏ အထူးအကြံပေး အဆင့်ကိုလည်း ချင်း လူ့ အခွင့်အရေး အဖွဲ့က ရရှိထားကြောင်း CHRO ၏ ဝက်ဆိုဘ်တွင် ဖော်ပြထားသည်။

ဆလိုင်း ထွန်းလှကျော်က သေဆုံးသွားသည့် ဒေါ်စိန်မဦးမှာလည်း အဖမ်းမခံရခင်က ကျန်းမာရေး ကောင်းမွန်သူ ဖြစ် ပြီး ၁ လကြာ ဖမ်းခံရပြီး ပြန်လွတ်လာသည့်အချိန်တွင် စိတ်ကယောင်ခြောက်ခြား ဖြစ်ကာ ကြောက်လန့်နေသဖြင့် ဖမ်းခံရစဉ် ညှင်းပန်းနှိပ်စက်ခံခဲ့ရကြောင်း သံသယရှိပါသည်ဟု ဆိုသည်။

ဒေါ်စိန်မဦးနှင့်အတူ ပြန်လွတ်လာသူများကလည်း AA နှင့် ပတ်သက်သည့် အကြောင်းအရာများကို ဖြေဆိုရန် ငြင်း ဆိုပြီး ရှောင်တိမ်းနေကြသည်ဟု ဆလိုင်းထွန်းလှကျော်က ပြောသည်။

ဆက်လက်ပြီး ၎င်းက “AA ရဲ့လုပ်ရိုးလုပ်စဉ်က ချင်းတွေ အများအပြား ဖမ်းခံရပြီး ပြန်လွတ်လာရင် သတင်းမပေါက် ကြားစေနဲ့ မိသားစုနဲ့ရွာကို အန္တရာယ်ပေးမယ် ဆိုတာမျိုး ခြိမ်းခြောက်တာတွေ ရှိပါတယ်။ ပြန်လွတ်လာသူတွေကို ချင်း အဖွဲ့တွေက မေးရင် သူတို့ ကြုံနေတဲ့ အခက်အခဲတွေကို ဖွင့်ချတာမျိုး မရှိပါဘူး။ အဓိက ကတော့ အကြောက်လွန် နေ ကြပါတယ်”ဟု ပြောသည်။

ဒေါ်စိန်မဦး သေဆုံးမှုနှင့် ပတ်သက်၍လည်း ချင်းအရပ်ဘက် အဖွဲ့အစည်းများမှ ကျေးရွာသို့ လိုက်သွားရာ ရုပ် အလောင်းကို ကြည့်ရှုခွင့်၊ ဓာတ်ပုံရိုက်ခွင့် မပေးဘဲ AA နှင့် ပတ်သက်၍လည်း မဖြေဆိုနိုင်ကြောင်း မိသားစုဝင်များက ငြင်းဆိုကာ ရှောင်နေကြသည်ဟု သိရသည်။

CUSR က စုဆောင်းထားသည့် သတင်း အချက်အလက်များအရ ရခိုင်ပြည်နယ် မြောက်ပိုင်းတွင် တပ်မတော်နှင့် AA တို့၏ တိုက်ပွဲများကြား ဖမ်းဆီးခံရခြင်း၊ အဓမ္မ ခိုင်းစေခံရခြင်း၊ ခြိမ်းခြောက်ခံရခြင်း စသည့် လူ့အခွင့်အရေး ချိုးဖောက် မှုများခံရသူ ဦးရေ ၁၂၀ ခန့် ရှိပါသည်ဟု ဆလိုင်းထွန်းလှကျော်က ဆိုသည်။

လူ့အခွင့်အရေး ချိုးဖောက်ခံရပါသည်ဟု စာရင်းပြုစုထားသည့် ဦးရေ ၁၂၀ ခန့်မှာ အမ်း၊ မင်းပြား၊ မြောက်ဦး၊ ကျောက် တော်၊ ဘူးသီးတောင်၊ ပုဏ္ဏားကျွန်းမြို့နယ် တို့မှ ဖြစ်သည်ဟု သိရသည်။

ချင်း လူ့အခွင့်အရေးအဖွဲ့ (CHRO) မှ ပြောရေးဆိုခွင့်ရှိသူ ဆလိုင်းလျန်က “ကျနော်တို့ မြန်မာနိုင်ငံက တရားဥပဒေ စိုးမိုးမှု လုံးဝမရှိတော့ ဒီစနစ်ကြီးမှာ ပြောင်းလဲမှု မရှိသရွေ့တော့ တရားမျှတမှု ရဖို့ကတော့ မလွယ်ပါဘူး။ ပထမဆုံး လိုအပ်တာကတော့ တရားဥပဒေ စိုးမိုးရေးရှိဖို့ လိုပါတယ်။ သူ့အတွက် ဟိုအတွက် Justice ကို တဦးတယောက်ချင်းစီ အတွက် လုပ်ပေးနိုင်တာ မရှိပါဘူး”ဟု ပြောသည်။

သို့သော် မြေပြင်မှ စုဆောင်းထားသည့် အချက်အလက်များ၊ လူ့အခွင့်အရေး မှတ်တမ်းများက တချိန်ချိန်တွင် တရား မျှတမှု ရနိုင်ရေးအတွက် အသုံးဝင်လာမည်ကို ယုံကြည်ပါသည်ဟု ဆလိုင်းလျန်က ဆိုသည်။

AA သည် ရခိုင်ပြည်နယ် မြောက်ပိုင်းနှင့် ချင်းပြည်နယ် တောင်ပိုင်း၊ ပလက်ဝမြို့နယ်တို့တွင် အရပ်သားများကို မသင်္ကာမှုဖြင့် ဖမ်းဆီးပါက ၎င်းတို့ ဖမ်းဆီးကြောင်း ဝန်ခံသည်များလည်း ရှိသည်။

ပဋိပက္ခကြား နေအိမ်များအတွင်း ဝင်ရောက် ဖမ်းဆီးခံရခြင်းများ၊ အမည်မသိ လက်နက်ကိုင် အဖွဲ့များက အရပ်သား များကို ဝင်ရောက် ဖမ်းဆီးသည့် ဖြစ်စဉ်များတွင် အရပ်သားများ ဘက်မှ AA ကို စွပ်စွဲသော်လည်း ၎င်းတို့ ဖမ်းကြောင်း ဝန်ခံခြင်း မရှိပါ။

ရခိုင် စကားပြောသူများမှာလည်း တပ်မတော်ထဲတွင် ရှိပြီး ၎င်းတို့ အယောင်ဆောင်ကာ ဖမ်းဆီးခြင်းများ ရှိနိုင်သည် ဟုလည်း AA ဘက်မှ တပ်မတော်ကို တန်ပြန် စွပ်စွဲပြောဆိုခြင်းများလည်း ရှိသည်။

တပ်မတော်နှင့် AA တို့၏ တိုက်ပွဲများ ဖြစ်ပွားစဉ် ပဋိပက္ခကာလ အတွင်း နှစ်ဖက်လုံးမှ အရပ်သားများကို မသင်္ကာမှု ဖြင့် ဖမ်းဆီးခြင်း၊ ရိုက်နှက်ခြင်းနှင့် အဓမ္မခိုင်းစေမှုများ ပြုလုပ်ခြင်းများ ရှိသည်။

တပ်မတော်ဘက်မှလည်း ပဋိပက္ခကာလအတွင်း ရခိုင်ပြည်နယ်မြောက်ပိုင်းတွင် အရပ်သား ၂၀၀ နှင့် အထက်ကို ဖမ်း ဆီးစစ်ဆေးခြင်း၊ ရိုက်နှက်ခြင်းများ ပြုလုပ်သဖြင့် လူ့အခွင့်အရေး ချိုးဖောက်မှုများ ကျူးလွန်ကြောင်း ရခိုင်နိုင်ငံရေး အသိုင်းအဝိုင်းတွင် ဝေဖန်ခံနေရသည်။

ဆက်စပ်ဖတ်ရှုရန်

ALP အဖွဲ့ဝင် ၃ ဦးကို AA ဖမ်းဆီး၊ တဦး အသတ်ခံရဟု သတင်းထွက်

ချင်းအမျိုးသမီး သေဆုံးမှုအပေါ် တပ်မတော်နှင့် AA တို့ အပြန်အလှန် စွပ်စွဲ

နယ်ခြားစောင့် ရဲတပ်ဖွဲ့ မိသားစုဝင် ၃ ဦးကို AA ပြန် လွတ်ပေး

The post AA ဖမ်းဆီးခဲ့သည့် ချင်းအမျိုးသမီး သေဆုံးမှု လူ့အခွင့်အရေးအဖွဲ့များထံ တင်ပြမည် appeared first on ဧရာဝတီ.

ဖိလစ်ပိုင်နိုင်ငံမှာ တင်းကျပ်တဲ့ ရုတ်သိမ်းမှုတွေကို ပြန်လည်ဖြေလျှော့မှုတွေ လုပ်ဆောင်နေပြီ ဖြစ်ပေမယ့် နိုင်ငံခြားသားတွေကို ပြည်ဝင်ခွင့်ပေးဦးမှာ မဟုတ်ဘူးလို့ ဖိလစ်ပိုင်သမ္မတရဲ့ ပြောရေးဆိုခွင့်ရပုဂ္ဂိုလ် Harry Roque က ပြောကြားခဲ့ပါတယ်။

ဖိလစ်ပိုင်အစိုးရအနေနနဲ့ ပြည်ပရောက် ဖိလစ်ပိုင်နိုင်ငံသားတွေကို ပြန်လည် ခေါ်ဆောင်တာမျိုး ပြုလုပ်နေချိန်မှာ နိုင်ငံခြားသားတွေကို ပြည်ဝင်ခွင့်ပြုလုပ်ရင် အစိုးရအတွက် ဝန်ထုပ်ဝန်ပိုး ဖြစ်စေလိမ့်မယ်လို့လည်း ပြောခဲ့ပါတယ်။

ဖိလစ်ပိုင်အစိုးရအနေနဲ့ ပြည်ပက ပြန်လာမယ့် နိုင်ငံသားတွေအတွက် လမ်းညွှန်မှု ချမှတ်ပေးထားပြီး နိုင်ငံခြားသားတွေကိုတော့ သံတမန်တွေကိုသာ ဝင်ရောက်ခွင့် ပြုထားပါတယ်။ အစိုးရရဲ့ဖော်ပြချက်ထဲမှာ ဖိလစ်ပိုင်နိုင်ငံတွင်းမှာ ရှိနေတဲ့ နိုင်ငံခြားသားတွေအနေနဲ့ နိုင်ငံအတွင်းကနေ အချိန်မရွေး ထွက်ခွာသွားနိုင်တယ်လို့ ဖော်ပြထားပေမယ့် ဖိလစ်ပိုင်နိုင်ငံသားတွေကတော့ ကျောင်းတက်ရောက်ဖို့ ကိစ္စမှတပါး ပြည်ပကို ခရီးထွက်ခွာခြင်း မပြုရဘူးလို့ ပါရှိပါတယ်။

COVID-19 ကာလအတွင်းက သတ်မှတ်ထားတဲ့ ပိတ်ဆို့မှုတွေကို ဖိလစ်ပိုင်မှာ ဒီအပတ်က စတင်ပြီး ဖြေလျှော့မှုတွေ ပြုလုပ်နေပါတယ်။ ပြည်ပကနေ ပြန်လာမယ့် နိုင်ငံသားတွေကြောင့် နိုင်ငံတကာ လေကြောင်းတချို့ကို ပြေးဆွဲခွင့်ပေးထားတယ်လို့ လူဝင်မှုကြီးကြပ်ရေး ဗျူရိုက ပြောပါတယ်။ ဖိလစ်ပိုင်မှာ မတ်လလောက်က စတင်ပြီး နိုင်ငံခြားသား ဝင်ရောက်မှုကို တားမြစ်ခဲ့ပါတယ်။

ဖိလစ်ပိုင်မှာ COVID-19 ကူးစက်ခံနေရသူ ၂ သောင်းနီးပါး ရှိနေပြီး ၉၇၄ ယောက် ရှိနေပါတယ်။ ဖိလစ်ပိုင်နိုင်ငံအနေနဲ့ နိုင်ငံခြားသားဝင်ရောက်မှုကို ကန့်သတ်ထားနေတုန်း ဖြစ်ပေမယ့် နိုင်ငံတချို့မှာတော့ ခရီးသွားလုပ်ငန်းတွေ ပြန်လည် စတင်ဖို့ ပြင်ဆင်နေကြပါပြီ။ ဘရာဇီး၊ ပြင်သစ်၊ အီတလီ စတဲ့ နိုင်ငံတွေမှာလည်း ကန့်သတ်မှုတွေ ပြန်လည် ရုတ်သိမ်းနေကြပါပြီ။

Ref: globalnation.inquirer

You may also like these stories:

ကိုဗစ်အလွန် စည်ကားလာမယ့် ခရီးသွားနိုင်ငံတွေထဲ မြန်မာ ပါဝင်

ဆိုက်ပရပ်စ်မှာ ခရီးသွားလုပ်ငန်းများ ပြန်စတင်မည်

The post နိုင်ငံခြားသားများအား ဖိလစ်ပိုင်သို့ ဝင်ရောက်ခွင့်ပြုဦးမည် မဟုတ် appeared first on ဧရာဝတီ.

ဇူလိုင်လအတွင်း အခြေခံပညာကျောင်းများ ပြန်လည် ဖွင့်လှစ်တော့မယ်လို့ ပညာရေးဝန်ကြီးဌာနက ထုတ်ပြန်ခဲ့ပြီး နောက်ပိုင်းမှာ ကျောင်းသား မိဘများစွာက သူတို့ရဲ့သားသမီးများအတွက် စိတ်ပူပန်မှုများစွာ ရှိနေကြပါတယ်။

ဒီထဲမှာမှ အဆိုတော် ဟဲလေးကတော့ ကျောင်းတက်မယ့် ကလေးတွေအတွက် စိတ်ပူသလို ကျောင်းပို့ကျောင်းကြို ပြုလုပ်ရမယ့် လူကြီးတွေအတွက်လည်း စိတ်ပူရတယ်လို့ ဧရာဝတီကို ပြောပါတယ်။

“ပြီးခဲ့တဲ့ တလောကဆို ကျောင်းဖွင့်ချိန်က နီးလာပြီဆိုတော့ စိုးရိမ်ပူပန်တာပေါ့။ အဘိုးအဘွားတွေက အဓိက လိုက်ပူတာပေါ့။ ဦးလေးတွေ၊ အဒေါ်တွေ၊ အဘိုးအဘွားတွေက ကျောင်းလိုက်ပို့ကြတော့ အဖေ၊ အမေတွေက အမြဲလိုက်မပို့နိုင်ဘူး။ လုပ်ငန်းခွင် ဝင်ကြရတယ်။ ဒီအတွက် စိုးရိမ်ကြရတယ်”

“ကလေးတွေကို လိုက်ပို့ရင်းကနေ လူကြီးတွေကို ကူးစက်လာမယ်ဆိုရင် အဓိကက သက်ကြီးရွယ်ပိုင်းတွေ ကူးစက်ခံရရင် အန္တရာယ်ကြီးနေတာကို လူငယ်တွေက ဖြစ်ပြီးရင် ပြန်ကောင်းလာကြတယ်။ ဒီအတွက်တော့ အရမ်းစိတ်ပူတယ်။ ကလေးတွေအတွက်တင် မဟုတ်ဘူး။ လူကြီးတွေအတွက်လည်း စိတ်ပူတယ်” လို့ ဟဲလေးက ဧရာဝတီကို ပြောပါတယ်။

ကျောင်းပို့ ကျောင်းကြိုကိစ္စများကို မိဘတွေက အလုပ်ရှိတာကြောင့် နေ့စဉ် မလုပ်နိုင်ဘဲ အဘိုးအဘွား၊ ဦးလေး၊ အဒေါ်တွေကသာ လုပ်နေတဲ့အတွက် ကူးစက်ခံရမှာကို စိုးရိမ်မိပြီး လူကြီးတွေက ပိုအန္တရာယ်များတယ်လို့ ဆိုပါတယ်။

“ကျနော်တို့ကလည်း အလုပ်အားတဲ့အချိန်တော့ လိုက်ပို့နိုင်တယ်။ နေ့တိုင်းတော့ မလုပ်နိုင်ဘူးပေါ့။ စိတ်ပူတာပေါ့။ အဲ့အတွက်ကြောင့် အခြေအနေလေးတခု ကြည့်ပြီးတော့မှ ထားဖို့အတွက် ရည်ရွယ်ထားပါတယ်။ တော်တော်များများ မိဘတွေလည်း စိတ်ပူကြပါတယ်။ အခြေအနေတွေက စိတ်ချရတဲ့အခြေအနေတော့ မရှိသေးပါဘူး” လို့ ဟဲလေးက ပြောပါတယ်။

အခု လက်ရှိမှာတော့ သားလေးတွေကို အွန်လိုင်းကနေ ပညာသင်ကြားပေးနေပြီး ဖုန်းကြည့်ချိန်များနေတာကြောင့်လည်း အချိန်ဇယားဆွဲကာ သတ်မှတ်ပေးထားတယ်လို့လည်း သိရပါတယ်။

“အခုဆိုရင်တော့ ကလေးတွေကို အချိန်ဇယားလေး ဆွဲထားပေးလိုက်တယ်။ ကလေးဆိုတော့ ဆော့ကလည်း ဆော့ချင်တယ်။ Game တွေ Youtube တွေကလည်း ကြည့်ချင်ကြတယ်ဆိုတော့ တီဗီကြည့်တဲ့အချိန်ကသက်သက်၊ ဂိမ်းဆော့တဲ့အချိန်ကသက်သက် ပြီးရင် စာအုပ်ဖတ်ရမယ်”

“တနေ့ကို အချိန်ဘယ်လောက်ဆိုပြီးတော့ သတ်မှတ်ပေးလိုက်တယ်။ ပြီးရင်ဂီတနဲ့ ပတ်သက်ပြီး လေ့လာပေါ့။ အိပ်ချိန်တွေရယ်ဆိုပြီး သတ်မှတ်ပေးလိုက်တယ်။ ကျောင်းတော့ မဖွင့်သေးပါဘူး။ အွန်လိုင်းကနေ စာသင်နေတယ်” လို့ ဟဲလေးက ပြောပါတယ်။

Stay home ကာလမှာ သားလေးတွေ အပြင်မထွက်တာကြာလို့ အပြင်ခေါ်ထုတ်ပေမယ့် အပြင်မထွက်ချင်ကြဘဲ မိဘတွေကိုတောင် ကလေးတွေက အပြင်မထွက်ဖို့ ပြန်ပြောတာတွေရှိတယ်လို့ ဟဲလေးက ဆိုပါတယ်။

The post “ကျောင်းဖွင့်ရင် ကြိုပို့လုပ်ရမယ့် လူကြီးတွေအတွက်လည်း စိတ်ပူတယ်” appeared first on ဧရာဝတီ.

အင်ဒိုနီးရှားနိုင်ငံအနေနဲ့ ပြည်တွင်း ကန့်သတ်ချက်တွေကို ပြန်လျှော့ချပေးဖို့ရှိနေပေမယ့် လာမယ့် ဒီဇင်ဘာလလောက်အထိ စာသင်ကျောင်းတွေကို ပြန်ဖွင့်နိုင်ဦးမှာ မဟုတ်ဘူးလို့ သိရပါတယ်။

လူမှုဖွံ့ ဖြိုးတိုးတက်ရေးနဲ့ ယဉ်ကျေးမှုဝန်ကြီးဖြစ်သူ Muhadjir Effendy ကလည်း အစိုးရအနေနဲ့ စာသင်ကျောင်းတွေကို အလျင်အမြန် ပြန်ဖွင့်မယ့် ဆုံးဖြတ်ချက်မျိုးကို ချမှတ်ဦးမှာ မဟုတ်သေးဘူးလို့ ပြောပါတယ်။ အင်ဒိုနီးရှားနိုင်ငံဟာ အရှေ့တောင်အာရှနိုင်ငံတွေထဲမှာ COVID-19 ကူးစက်မှုအများဆုံး ဖြစ်ပွားခဲ့တဲ့နိုင်ငံစာရင်းထဲ ပါဝင်ခဲ့ပြီး အာရှနိုင်ငံတွေထဲမှာဆိုရင်လည်း အဆင့် ၁၂ နေရာက ရပ်တည်နေပါတယ်။

ကိုဗစ်ကာလအတွင်း အင်ဒိုနီးရှားနိုင်ငံမှာ လူပေါင်း ၁,၆၉၈ ယောက် သေဆုံးခဲ့ပြီး အရှေ့တောင်အာရှ မှာ လူသေဆုံးမှု အများဆုံးနိုင်ငံ ဖြစ်ခဲ့ပါတယ်။ ဒါကြောင့်လည်း အင်ဒိုနီးရှားအစိုးရအနေနဲ့ စာသင်ကျောင်းတွေကို အလျင်အမြန် ပြန်ဖွင့်ဖို့ ဆုံးဖြတ်ချက် မချရခြင်းပါ။

ရောဂါကူးစက်နိုင်တဲ့ နည်းလမ်းတွေကို စဉ်းစားကြည့်တဲ့အခါ ကျောင်းကနေတဆင့် ပြန်လည် ကူးစက်တဲ့နည်းလမ်းက ပိုမိုများပြားလာနိုင်တဲ့အတွက် အခုလို ကျောင်းဖွင့်ဖို့ နောက်ဆုတ်လိုက်ရခြင်းဖြစ်တယ်လို့ Mr.Effendy က ပြောပါတယ်။ အင်ဒိုနီးရှားအစိုးရအနေနဲ့ ကလေးတွေရဲ့ကျန်းမာရေးကဏ္ဍကိုလည်း အများကြီးထည့်သွင်း စဉ်းစားထားကြောင်း သူက ပြောပါတယ်။

နောက်လာမယ့်လဟာ အင်ဒိုနီးရှားနိုင်ငံရဲ့ ပညာသင်နှစ်အစ ဖြစ်ပေမယ့် ကျောင်းတွေ ပြန်ဖွင့်ဖို့က မသေချာတဲ့ အခြေအနေမှာ ရှိနေပါတယ်။ မူလတန်း၊ အလယ်တန်း၊ အထက်တန်းနဲ့ တက္ကသိုလ်ကျောင်းတွေ အားလုံး ဒီဇင်ဘာ ဒါမှမဟုတ် ၂၀၂၁ ခုနှစ်အစောပိုင်းကာလ လောက်မှသာ ပြန်ဖွင့်နိုင်မယ်လို့ သိရပါတယ်။

ပညာရေးဆိုင်ရာလက်ထောက်ညှိနှိုင်းရေးမှူးဖြစ်သူ Mr.Agus Sartono ကလည်း အစိုးရအနေနဲ့ ပညာသင်နှစ်ကို နောက်ဆုတ်မယ်ဆိုရင်တော့ ကျောင်းသားတွေအနေနဲ့ အဝေးသင်စနစ်ကို အကောင်အထည် ဖော်သင့်တယ်လို့ ပြောပါတယ်။ အဲဒီလိုသာဆိုရင် ဒီဇင်ဘာမှာ ကျောင်းဖွင့်တာထက် ပိုပြီး ကောင်းမွန်ရှိတယ်လို့ သူက ပြောပါတယ်။

ပြီးခဲ့တဲ့ မေလအတွင်းမှာတော့ အင်ဒိုနီးရှားအစိုးရက စာသင်ကျောင်းတွေကို ဇူလိုင် ၁၃ ရက်နေ့မှာ စတင်ဖွင့်လှစ်ဖို့ ပြင်ဆင်ခဲ့ပါသေးတယ်။

အင်ဒိုနီးရှားနိုင်ငံအနေနဲ့ ဇွန်လ ၅ ရက်နေ့က စတင်ပြီး ဂျာကာတာအပါအဝင် တခြားနေရာတွေကို ကန့်သတ်မှုတွေ လျှော့ချပေးဖို့ ပြင်ဆင်နေပြီး စီးပွားရေးလုပ်ငန်းတွေကို ပြန်လည် လုပ်ဆောင်ခွင့်ပြုပါတော့မယ်။ လက်ရှိအချိန်မှာတော့ အင်ဒိုနီးရှားနိုင်ငံမှာ ရောဂါကူးစက်ခံနေရသူပေါင်း ၂၈,၀၀၀ ကျော် ရှိနေပါတယ်။

Ref: CNA

The post အင်ဒိုနီးရှားတွင် ဒီဇင်ဘာလအထိ ကျောင်းများ ဖွင့်နိုင်မည် မဟုတ် appeared first on ဧရာဝတီ.

တရုတ်နိုင်ငံပိုင်လုပ်ငန်းတခု၏ သြစတြေးလျ အခြေစိုက်လုပ်ငန်းအား မြန်မာနိုင်ငံမြောက်ပိုင်း စစ်ကိုင်းတိုင်းရှိ စင်္ကာပူနိုင်ငံအရွယ်မျှ ကျယ်ဝန်းသော မြေနေရာတွင် ကြေးနီနှင့်ရွှေ ရှာဖွေခွင့် ပေးလိုက်ကြောင်းသိရသည်။ စစ်ကိုင်းတိုင်းသည် တရုတ်လုပ်ငန်းများက ကြီးမားသည့် ကြေးနီစီမံကိန်းများလုပ်ဆောင်နေပြီးဖြစ်သည့် ဒေသဖြစ်သည်။

စစ်ကိုင်းတိုင်းရှိ ဝန်းသို တောင်တန်းဒေသမှ မြေ ၁၈၅၀၀၀ ဧကထက် မနည်းသော မြေပေါ်တွင် ကြေးနီနှင့်ရွှေ ရှာဖွေရန် နေပြည်တော်ရှိ သဘာဝသယံဇာတနှင့် ပတ်ဝန်းကျင်ထိန်းသိမ်းရေးဝန်ကြီးဌာန(MONREC)က PanAust အမည်ရှိ ထိုလုပ်ငန်းကို ပြီးခဲ့သည့်အပတ် ဗုဒ္ဓဟူးနေ့က ခွင့်ပြုချက်ပေးလိုက်ခြင်းဖြစ်သည်။

PanAust ကို Guangdong Rising Assets Management Co. Ltd (GRAM) က အပြည့်အဝပိုင်ဆိုင်သည့် လုပ်ငန်းခွဲဖြစ်သော သြစတြေးလျ အခြေစိုက် Guangdong Rising H.K. Ltd က ပိုင်ဆိုင်သည်။ Guangdong Rising Assets Management Co. Ltd (GRAM) သည် တရုတ်နိုင်ငံ ကွမ်တုံ ပြည်နယ်အခြေစိုက် တရုတ်နိုင်ငံပိုင်လုပ်ငန်းဖြစ်ပြီး တွင်းထွက်သယံဇာတထုတ်လုပ်မှု၊ အီလက်ထရွန်းနစ်၊ စက်မှုစွန့်ပစ်ပစ္စည်း စီမံခန့်ခွဲမှု၊ အိမ်ခြံမြေနှင့် ဘဏ္ဍာရေး ရင်းနှီးမြှုပ်နှံမှု လုပ်ငန်းတခုဖြစ်သည်။

မြန်မာနိုင်ငံတွင် PanAust သည် အထက်ပါစီမံကိန်းကို လုပ်ကိုင်ရန် Wuntho Resources Company Limited (WRCL) အမည်ရှိ ဖက်စပ်လုပ်ငန်းတခုကို Myanmar Energy Resources Group International Company Ltd (MERG) နှင့် ပူးပေါင်းထူထောင်ထားသည်။ PanAust က WRCL ၏ ၉၀ ရာခိုင်နှုန်းကို ပိုင်ဆိုင်ပြီး MERG က ကျန် ၁၀ ရာခိုင်နှုန်းကို ပိုင်ဆိုင်သည်။

လက်ရှိတွင် WRCL သည် အထက်ပါဒေသတွင် စုစုပေါင်းမြေဧက ၃၇၀၀၀၀ ကျော် ကျယ်ဝန်းသည့် သတ္တုရှာဖွေတူးဖော်ခွင့် လိုင်စင် ၇ ခုရရှိထားကြောင်း PanAust ၏ အဆိုအရ သိရသည်။

၂၀၁၈ ခုနှစ်က ထိုလုပ်ငန်းသည် ဝန်းသိုတောင်တန်းရှိ တုန်ကျောင်း၊ တောင်ကုန်းနှင့် နောက်ဖတ် လုပ်ကွက်များရှိ မြေဧက၁၃၈၀၀၀ တွင် ရှာဖွေတူးဖော်ခွင့်လိုင်စင်များရခဲ့သည်။ ၂၀၁၆ ခုနှစ်ကလည်း WRCL သည် စစ်ကိုင်းတိုင်း ဟယ်ချိန်း၊ ပင်ဟင်ခ နှင့် နမ်အောလုပ်ကွက် ၃ ခုရှိ မြေ ၅၂၆၀၀ ဧကတွင် ရှာဖွေတူးဖော်ခွင့်လိုင်စင်ရခဲ့သည်။

ပြည်ပကျောထောက်နောက်ခံပြု လုပ်ငန်းတခုသို့ ကြီးမားကျယ်ပြန်ံသည့် လိုင်စင်များ ချထားပေးရန် အစိုးရက ဆုံးဖြတ်လိုက်သောကြောင့် ဒေသခံ အသေးစား သတ္တုတူးဖော်ရှာဖွေသူများ ကလက်မခံနိုင်ဖြစ်လိမ့်မည်ဖြစ်ကြောင်း ဝန်းသိုမြို့နယ်ကို ကိုယ်စားပြုသည့် စစ်ကိုင်းတိုင်းလွှတ်တော်ကိုယ်စာလှယ် ဦးဇော်လင်းဦး ပြောသည်။

“ဒီဆုံးဖြတ်ချက်က ပြည်ထောင်စုအဆင့်က လာတာ။ ဒါပေမယ့် သတ္တု ရှာဖွေတူးဖော်ဖို့ မြေတွေအားလုံးက နိုင်ငံခြားလုပ်ငန်းတွေ လက်ကိုရောက်သွားလို့ ဒေသခံတွေက သူတို့အသက်မွေးဝမ်းကြောင်းအတွက် ဘာလုပ်စားရမယ်ဆိုတာကို စိတ်ပူနေကြပြီ”ဟု ဦးဇော်လင်းဦး ပြောသည်။

“ကျနော်တို့က တိုင်းဒေသအဆင့်ပဲရှိတော့ ပြည်ထောင်စုအဆင့်က လုပ်တာကို ဝင်ရောက်စွက်ဖက်လို့မရဘူး။ ဒါပေမယ့် ဒေသခံတွေက လက်ခံမှာမဟုတ်ဘူး။ လိုင်စင်ချထားပေးတဲ့နေရာက အရမ်းကို ကျယ်တော့ ဒေသခံတွေက ကျေနပ်မှာ မဟုတ်ဘူး” ဟု သူပြောသည်။

စစ်ကိုင်းတိုင်းသည် အငြင်းပွားဖွယ်ရာ စပယ်တောင်နှင့်ကြေးစင်တောင် စီမံကိန်း(S&K) နှင့် လက်ပတောင်းစီမံကိန်းများအပါအဝင် တရုတ်လုပ်ငန်းများ၏ ကြီးမားလှသော ကြေးနီစီမံကိန်းများ ရှိရာဒေသဖြစ်သည်။ S&K ကိုလုပ်ကိုင်နေသည့် မြန်မာယန်စီလုပ်ငန်းက မြို့နယ် ၃ မြို့နယ်မှ ကျေးရွာပေါင်း ၁၂၀ ပါဝင်သည့် ဝါးစိမ်းတောင်ဒေသတွင် သတ္တုရှာဖွေတူးဖေါ်ရန် လွန်ခဲ့သောနှစ်က အဆိုပြုသောကြောင့် ဒေသခံများ ဆန့်ကျင်ကန့်ကွက်ခဲ့သည်။ ထိုစီမံကိန်း၏ သဘာဝပတ်ဝန်းကျင်နှင့်လူမှု ထိခိုက်မှုများကို ဒေသခံများ စိုးရိမ်သောကြောင့် လေ့လာရှာဖွေရေးလုပ်ငန်းများကို ဆိုင်းငံ့ခဲ့ရသည်။

လက်ပတောင်းစီမံကိန်းကို Myanmar Wanbao Mining Copper Ltd (MWMCL) ကလုပ်ကိုင်နေသည်မှာ နှစ်ပေါင်းများစွာကြာပြီဖြစ်ပြီး မြေယာအငြင်းပွားမှုများနှင့် ဒေသခံ ဆန့်ကျင်သူများကို အကြမ်းဖက်နှိမ်နင်းမှုများကြောင့် သတင်းများတွင် ဖေါ်ပြခံနေရသည်။ အသက်မွေးဝမ်းကြောင်းဆုံးရှုံးခြင်းနှင့် သတ္တုတူးဖော်ရေးလုပ်ငန်းမှ စွန့်ပစ်ပစ္စည်များကြောင့် ရေ အရင်းအမြစ်များထိခိုက်ပျက်စီးခြင်းအပါအဝင် ထိုသတ္တုတူးဖော်ရေး လုပ်ငန်း၏ ဆိုးရွားလှသော လူမှုထိခိုက်မှုများကို နိုင်ငံတကာလွတ်ငြိမ်းချမ်းသာခွင့်အဖွဲ့၏ အစီရင်ခံစာနှစ်စောင်တွင် ကျယ်ကျယ်ပြန့်ပြန့် ဖေါ်ပြထားသည်။ ထိုစီမံကိန်းကိုဆန့်ကျင်သည် ဒေသခံများကို တနိုင်ငံလုံးက ထောက်ခံကြသည်။

သတ္တုတူးဖော်ရေးလုပ်ငန်းများကြောင့် စစ်ကိုင်းတိုင်းသည် ကြီးမားသည့် သဘာဝပတ်ဝန်းကျင်နှင့်လူမှု ထိခိုက်မှုများကိုခံနေရပြီးဖြစ်ကြောင်း ဦးဇော်လင်းဦးပြောသည်။

“ခုချိန်အထိတော့ အဲဒီလုပ်ငန်းက ကိုယ်စားလှယ်တွေက ဒီစီမံကိန်းအကြောင်း ကျနော်တို့ကို လာရှင်းပြတာ မရှိသေးဘူး။ ဒီကိုလာတဲ့ လုပ်ငန်းတွေက အားလုံးအတူတူပဲ။ ကျနော်တို့ကို မဆက်သွယ်ကြဘူး။ ပြည်ထောင်စုအဆင့်က ခွင့်ပြုချက်ရပြီးလို့ ကျနော်တို့နဲ့ ဆက်ဆံဖို့မလိုဘူးလို့ ထင်နေကြတာနေမှာ” ဟုလည်း သူပြောသည်။

၎င်းတို့၏ လုပ်ငန်းသည် ကြေးနီနှင့် ရွှေ ထုတ်လုပ်ရောင်းချရာတွင် ရေရှည်တည်တံ့သော စီးပွားရေး ပုံစံနှင့် ထုတ်လုပ်ရေးရည်မှန်းချက် ပြည့်၀ရေးနှင့် ထက်မြက်တာဝန်သိသော တိုးတက်မှုကို အာရုံစိုက်ကြောင်း PanAust ၏ ထုတ်ပြန်ချက်တွင် ဖေါ်ပြထားသည်။

PanAust သည် ၎င်းတို့လုပ်ကိုင်သောဒေသများတွင် ကျန်းမာရေး၊ ပညာရေးနှင့် သယ်ယူပို့ဆောင်ရေး အခြေခံအဆောက်အအုံများ သိသိသာသာတိုးတက်စေခဲ့ကြောင်း PanAust ၏ အမှုဆောင် ဥက္ကဌ Qun Yang ကပြောသည်။

“မြန်မာနိုင်ငံ ရှာဖွေထုတ်လုပ်ရေး လုပ်ငန်းတွေကို လုပ်ကိုင်ရာမှာ ကျနော်တို့လုပ်ငန်းရဲ့ လုပ်ကိုင်မှုတွေဟာ အလုပ်အကိုင်ဖန်တီးမှုအပါအဝင် နိုင်ငံရဲ့ ရေရှည် စီးပွားတိုးတက်အောင်မြင်မှုကို အကျိုးပြုနိုင်အောင်လို့ ရေရှည်တည်တံ့ရေးအလေ့အထကောင်းတွေကို ကျင့်သုံးသွားမှာဖြစ်တယ်” ဟုလည်း သူပြောသည်။

PanAust သည် ပါပူဝါ နယူးဂီနီ၊ ချီလီနှင့်လာအိုနိုင်ငံများမှ ကြေးနီနှင့် ရွှေတူးဖေါ်သည့် လုပ်ငန်းများကိုလည်း လုပ်ကိုင်နေသည်။ PanAust ၏ လုပ်ငန်းခွဲ Frieda River Ltd သည် ပါပူဝါ နယူးဂီနီတွင် Frieda River စီမံကိန်းဟု ခေါ်သည့် ကမ္ဘာ့အကြီးမားဆုံး ရွှေနှင့်ကြေးနီတူးဖေါ်ထုတ်လုပ်သည့် လုပ်ငန်းကို လုပ်ကိုင်နေသည်။ ထိုစီမံကိန်းသည် မြစ်ချောင်းစနစ်ကို ပျက်စီးစေပြီး ငါးများကို အဆိပ်သင့်စေကာ အကြမ်းဖက်သည့် မတည်ငြိမ်မှုများဖြစ်စေကြောင်း Jubilee Australia သုတေသနဌာန၏ အစီရင်ခံစာကို အခြေခံပြီး Guardain သတင်းစာက ဖေါ်ပြခဲ့သည်။

( Nan Lwin ၏ Chinese-Backed Firm Granted Massive Copper and Gold Exploration Permit in Myanmar ကို ဘာသာပြန်ဆိုသည်။ )

You may also like these stories:

ကိုဗစ်-၁၉ ကြောင့် ချင်းပြည်နယ် ပထမဆုံးလေယာဉ်ကွင်း ဖွင့်ရန် နှောင့်နှေးနေ

ဝေဖန်ခံနေရသော ဆိုလာပါဝါစီမံကိန်း တင်ဒါ အချိန်ထပ်တိုးပေး

ကိုဗစ်အလွန်ကာလ နိုင်ငံခြား ရင်းနှီးမြှုပ်နှံမှု မြှင့်တင်ဖို့ ကြိုတင်ပြင်ဆင်နေပါတယ်

The post တရုတ်ပိုင် သြစတြေးလျ အခြေစိုက် လုပ်ငန်းကို ကြေးနီနှင့်ရွှေ ရှာဖွေတူးဖော်ခွင့်ပေး appeared first on ဧရာဝတီ.

ရှမ်းပြည်မြောက်ပိုင်း မူဆယ်မြို့နယ်တွင် တာဝန်ကျနေသည့် ကျန်းမာရေးမှူးတဦးတွင် Covid-19 ကူးစက်ခံထားရသည်ကို အင်္ဂါနေ့က တွေ့ရှိခဲ့သည်ဟု ကျန်းမာရေးနှင့်အားကစားဝန်ကြီးဌာန၏ ထုတ်ပြန်ထားချက်အရသိရသည်။

ထိုသို့ ကူးစက်ခံရခြင်းသည် ပြည်တွင်းကူးစက်မှုများ ၂ ပတ်ကြာ ကင်းစင်နေရာမှ အသစ်ပြန်လည်တွေ့ရှိခြင်းဖြစ်သည်။

အသက် ၃၀ အရွယ် အဆိုပါကျန်းမာရေးမှူးတွင် ခရီးသွားရာဇဝင်များမရှိသကဲ့သို့ ရောဂါကူးစက်ခံထားရသူများနှင့်လည်း တိတွေ့ဆက်ဆံမှုလည်း မရှိပေ။

အဆိုပါ ကိုဗစ်လူနာမှာ အင်္ဂါနေ့တွင် တွေ့ရှိသည့် ကိုဗစ်-၁၉ ကူးစက်ခံရသူ ၄ ဦးတွင် တဦးအပါအဝင်ဖြစ်ကြောင်း ကျန်းမာရေးနှင့် အားကစားဝန်ကြီးဌာန၏အဆိုရ သိရသည်။

အခြားကူးစက်ခံရသူ ၃ ဦးတို့မှာ အိန္ဒိယ၊ တရုတ်နှင့် မလေးရှားနိုင်ငံများမှ ပြန်လာသည့် မြန်မာနိုင်ငံသားများ ဖြစ်သည်။

မြို့နယ်အတွင်း တာဝန်ချထားခံရသည့် ကျန်းမာရေးဝန်ထမ်းပေါင်း ၄၀ ကျော်အား အများပြည်သူနှင့်တိတွေ့နေရသဖြင့် ကိုဗစ်-၁၉ ကူးစက်ခံရမှု ရှိမရှိ သိရှိနိုင်ရန် ၎င်းတို့၏ဓါတ်ခွဲခန်းနမူနာများကို သောကြာနေ့တွင် ရယူပြီးစစ်ဆေးခဲ့ခြင်းဖြစ်ကြောင်း ရှမ်းပြည်နယ်လူမှုရေးဝန်ကြီး ဒေါက်တာမျိုးထွန်းက မီဒီယာသို့ ဖြေကြားထားသည်။

အဆိုပါ လူနာကို မူဆယ်ခရိုင်ပြည်သူ့ဆေးရုံတွင် သီးခြားထားရှီပြီး သူမ၏အမျိုးသားကိုလည်း သီးခြားထားစောင့်ကြည့်ပြီး ကိုဗစ်-၁၉ ကူးစက်ခံရမှု ရှိ၊ မရှိ စစ်ဆေးသွားမည်ဖြစ်ကြောင်း သိရသည်။

လူနာနှင့် ထိတွေ့ဆက်ဆံခဲ့သူများကို ပြည်နယ်ကျန်းမာရေးဌာနက ခြေရာခံရှာဖွေနေသည်။

လတ်တလောတွင် လူနာနှင့် ထိတွေ့မှုရှိခဲ့သည့် လူပေါင်း ၄၀ ကျော်ကို သီးသန့်ထားရှိစောင့်ကြည့်ပြီး၎င်းတို့တွင် ကိုဗစ်-၁၉ ကူးစက်ခံရမှု ရှိမရှိ စစ်ဆေးပေးသွားမည်ဟု ကျန်းမာရေးဝန်ကြီးဌာန၏ ပြောရေးဆိုခွင့်ရှိသူ ဒေါက်တာသန်းနိုင်စိုးက ဧရာဝတီကိို ဇွန် ၄ ရက်နေ့က ပြောသည်။

အဆိုပါ ကျန်းမာရေးမှူးသည် မူဆယ်မြို့၊ မိုင်းပေါ်ကျေးရွာအုပ်စုအတွက် တာဝန်ပေးခံထားရသည့် ကျန်းမာရေး တာဝန်ခံတစ်ဦးဖြစ်သည်ဟု မူဆယ်မြို့နယ်မှ လွှတ်တော်ကိုယ်စားလှယ် ဦးစိုင်းကျော်သိန်းက ပြောသည်။

မြန်မာနိုင်ငံတွင် ကိုဗစ်-၁၉ ရောဂါရှာဖွေစမ်းသပ်မှု နေ့စဉ် ၁၅၀၀ ခန့်ပြုလုပ်နေကြာင်း ကျန်းမာရေးဝန်ကြီးဌာနက ပြောသည်။ ဗုဒ္ဒဟူးနေ့ နေ့လယ်အထိ မြန်မာနိုင်ငံတွင် ကိုဗစ်-၁၉ ရှာဖွေစမ်းသပ်မှု ၃၀၀၀၀ နီးပါးဆောက်ရွက်ပြီး ဖြစ်သည်။

မြန်မာနိုင်ငံတွင် ကိုဗစ်-၁၉ ကူးစက်မှု ၂၃၄ ခုရှိပြီး ပြည်ပမှ ဝင်ရောက်လာသော ကူးစက် ၄၅ ခု၊ သေဆုံးမှု ၆ ခုနှင့် ပြန်လည်ကောင်းမွန်လာသူ ၁၄၅ဦး ရှိပြီဖြစ်သည်။

You may also like these stories:

မောင်တောမှ ကိုရိုနာဗိုင်းရပ်တွေ့သူမှာ သတင်းမပို့ဘဲ ပြန်ဝင်လာသူဖြစ်

ဘင်္ဂလားဒေ့ရှ် ဒုက္ခသည်စခန်းတွင် ပထမဆုံး ကိုဗစ်-၁၉ ကြောင့် သေဆုံး

ဘာသာရေး အခမ်းအနား၌ ပါဝင်သည့် မြန်မာ တဗလိဂ် ၂၂ ဦးကို အိန္ဒိယအစိုးရ အမှုဖွင့်ထား

The post မူဆယ်က ကိုရိုနာဗိုင်းရပ်ပိုးကူးသူသည် ကျန်းမာရေးမှူးဖြစ် appeared first on ဧရာဝတီ.

လာမည့် ၂၀၂၀ ခုနှစ် ပါတီစုံ ဒီမိုကရေစီ အထွေထွေ ရွေးကောက်ပွဲကို ယခင် ကျင်းပခဲ့ပြီး ဖြစ်သည့် အခြား ရွေးကောက်ပွဲ များနည်းတူ မပြောင်းလဲဘဲ လာမည့် နိုဝင်ဘာလအတွင်း ကျင်းပသွားရန် ပြည်ထောင်စု ရွေးကောက်ပွဲ ကော်မရှင် (UEC) က ပြင်ဆင်လျက်ရှိကြောင်း သတင်း ရရှိသည်။

UEC ၏ ပြောရေးဆိုခွင့်ရှိသူ ဦးမြင့်နိုင်က ယနေ့ နေပြည်တော်ရှိ ၎င်းတို့၏ ရုံးတွင် သတင်းထောက်များကို အထက်ပါ အတိုင်း ပြောဆိုလိုက်ခြင်း ဖြစ်သည်။

UEC ၏ အဖွဲ့ဝင်လည်းဖြစ်သူ ဦးမြင့်နိုင်က“ကျနော်တို့ မပြောင်းလဲပါဘူး။ အရင်တုန်းက ကျင်းပတဲ့အတိုင်းပဲ နိုဝင်ဘာ လထဲမှာပဲ ဖြစ်မှာပါ”ဟု သတင်းထောက်များကို ပြောသည်။

လက်ရှိတွင် လူအများ စိုးရိမ်နေကြသည့် ကမ္ဘာ့ ကပ်ရောဂါ တခုဖြစ်သော COVID – 19 ကိုလည်း မြန်မာနိုင်ငံက ထိန်းချုပ် နိုင်သည့် အခြေအနေတွင် ရှိခြင်း၊ ကျင်းပနိုင်မည့် ရက်မှာလည်း လိုအပ်နေသေးခြင်းတို့ကြောင့် ယခင် ပြောဆို ထားသည့် အတိုင်း ဆောင်ရွက်မည်ဟု ကော်မရှင် တာဝန်ရှိသူများက ပြောသည်။

၂၀၁၀ ရွေးကောက်ပွဲကို နိုဝင်ဘာလ ၇ ရက်တွင် ကျင်းပခဲ့ပြီး ၂ လနှင့် ၂၄ ရက် ကြိုတင်ကြေငြာခဲ့သလို ၂၀၁၅ ရွေးကောက်ပွဲကို နိုဝင်ဘာလ ၈ ရက်နေ့တွင် ကျင်းပခဲ့ပြီး ၄ လအလိုတွင် ကြိုတင်ကြေငြာခဲ့ကြောင်း သိရသည်။

လာမည့် ၂၀၂၀ ရွေးကောက်ပွဲကိုလည်း ယခင်ကျင်းပခဲ့သည် ၂၀၁၀ နှင့် ၂၀၁၅ ရွေးကောက်ပွဲ ကြိုတင်ကြေငြာခဲ့သည့် ရက်များကို နမူနာယူ၍ အများအတွက် သင့်တော်မည့်ရက်ကို ကျင်းပပေးမည်ဟု ကော်မရှင် တာဝန်ရှိသူ ဦးမြင့်နိုင်က ပြောသည်။

“အဲဒီမှာ ဘယ်ရက်က သင့်တော်သလဲ၊ သင့်တော်တဲ့ ရက်ကို အများအတွက် ကောင်းမယ့်ရက်ကို ယူ ပြီးတော့ ကြေငြာမှာပေါ့နော်။ အဲဒီ ၂ ခုမှာ ဘယ်ဟာရွေးမလဲဆိုရင်တော့ အားလုံးအတွက် အဆင်ပြေမယ့် ရက်ကိုရွေးပြီး ကြေငြာမှာပေါ့။ အဲဒီအတိုင်းပဲသွားမယ်။ ဒါဆိုရင် ခန့်မှန်းလို့ရပါပြီ”ဟု ၎င်းက ပြောသည်။

ယနေ့တွင် နေပြည်တော်ရှိ ပြည်ထောင်စုရွေးကောက်ပွဲ ကော်မရှင်ရုံးတွင် တိုင်း နှင့်ပြည်နယ် ရှိ ရွေးကောက်ပွဲ ကော်မရှင်အဖွဲ့ ဥက္ကဌများ၊ ရွေးကောက်ပွဲ အရာရှိများနှင့် အစည်းအဝေးပြုလုပ်ကာ မဲဆန္ဒနယ်များ သတ်မှတ်ရန်အတွက် ညှိနှိုင်းဆွေးနွေးမှုများ ပြုလုပ်ခဲ့သည်။

ရွေးကောက်ပွဲ မကျင်းပခင် မဲဆန္ဒနယ်များ စာရင်းကြေငြာခြင်း၊ ထို့နောက် ပြည်သူ့လွှတ်တော်၊ အမျိုးသားလွှတ်တော်၊ တိုင်းဒေသကြီးနှင့် ပြည်နယ်၊ တိုင်းရင်းသား လူမျိုးရေးရာ မဲဆန္ဒနယ်များ ကြေညာခြင်း၊ ထိုနောက် မည်သည့်ရက်တွင် ကျင်းပမည်ဆိုသည်ကို ကြေညာခြင်းနှင့် ထိုသို့ ကြေငြာပြီးမှသာ လွှတ်တော်ကိုယ်စားလှယ်လောင်းများ တင်သွင်းရမည့် ရက် ကြေငြာခြင်း စသဖြင့် အဆင့်ဆင့် လုပ်ဆောင်သွားမည်ဟု သိရသည်။

၂၀၂၀ ခုနှစ် မတ်လထိ ပြုစုထားသည့် စာရင်းများအရ ၂၀၂၀ ရွေးကောက်ပွဲတွင် မဲပေးနိုင်သူဦးရေ ၃၇ သန်းကျော်ရှိပြီး ထိုစာရင်းတွင် တပ်မတော်သားများနှင့်အတူနေ အိမ်ထောင်စုဝင်များ၏ အခြေခံ မဲစာရင်းများ ထည့်သွင်းရန် ကျန် ရှိသေးကြောင်းနှင့် မဲဆန္ဒနယ်များအလိုက် မဲပေးခွင့်ရှိသူများ၏ အမည်စာရင်းများကို ရွေးကောက်ပွဲ မတိုင်မီ ကြေငြာပေးသွားမည်ဖြစ်ကြောင်း သိရသည်။

UEC ၏ ၂၀၂၀ ခုနှစ် မေလအတွင်း ထုတ်ပြန်ထားသည့် စာရင်းများအရ တည်ဆဲ မှတ်ပုံတင်ထားသည့် ပါတီ ၉၇ ပါတီ ရှိပြီး ပြည်ထောင်စု တဝန်းလုံးတွင် စည်းရုံးမည့်ပါတီ ၇၉ ပါတီ၊ တိုင်းဒေသကြီး/ပြည်နယ် တခုတည်းတွင်သာ စည်းရုံးမည့် ပါတီ ၁၈ ပါတီ၊ ယာယီရပ်ဆိုင်းထားပါတီ ၃ ပါတီ ရှိကြောင်း သိရသည်။

You may also like these stories:

တပ်တွင်းသို့ နိုင်ငံရေးအရ ဝင်ရောက် မဲဆွယ်စည်းရုံးခွင့် မပြုဟု UEC ပြော

၂၀၂၀ ရွေးကောက်ပွဲတွင် မဲရုံများ ထပ်တိုးဖွင့်လှစ်မည်

The post ၂၀၂၀ ရွေးကောက်ပွဲကို လာမည့် နိုဝင်ဘာလတွင် ကျင်းပမည် appeared first on ဧရာဝတီ.

အချိန်မရွေး ပြေးရ၊ ပုန်းရနိုင်တဲ့ နယ်မြေထဲကနေ ဒေါ်ပြီတင်းတို့ သားအမိ ထွက်ပြေးလာခဲ့တာ ၃ လ ရှိပါပြီ။ သားအမိ နှစ်ယောက်က ပလက်ဝကနေ လှေစီးပြီး ရခိုင်ပြည်နယ်၊ ကျောက်တော်မြို့ကို တဆင့်၊ ကျောက်တော်ကနေ ရန်ကုန်ကို ထပ်ပြီး ခရီးဆက်လာကြတာ ဖြစ်ပါတယ်။

ရန်ကုန်လို လုံခြုံတဲ့ နေရာကို ရောက်ဖို့ ဒေါ်ပြီတင်းတို့ ကား ၁ တန်၊ လှေ ၁ တန်၊ သင်္ဘော ၁ တန်နဲ့ အဆင့်ဆင့် မိုင်ပေါင်း ၆၀၀ ကျော်ကို ခရီးနှင်ခဲ့ကြရတာပါ။ အခုတော့ ပြေးစရာ ပုန်းစရာ မလိုတဲ့ ရန်ကုန်တိုင်းဒေသကြီး မှော်ဘီမြို့နယ်ထဲက စစ်ဘေးရှောင် စခန်းမှာ ဒုက္ခသည်အဖြစ် ခိုလှုံနေပါတယ်။

“ကျမတို့ ပလက်ဝမှာ အသိလည်းမရှိတော့ နေဖို့ ထိုင်ဖို့လည်း မရှိဘူး။ ပြီးတော့ လုံခြုံမယ်လို့လည်း မထင်ဘူး။ နေရာ တိုင်းက တိုက်ပွဲတွေ ဖြစ်နေတာလေ။ ရန်ကုန်ကို ရောက်ရင်တော့ ပစ်ထားကြမှာ မဟုတ်ဘူးလို့ တွေးပြီး ပြေးလာတာ” လို့ သူက ပြောပါတယ်။

နေရပ်ရင်းဖြစ်တဲ့ ချင်းပြည်နယ်တောင်ပိုင်း၊ ပလက်ဝမြို့နယ်၊ မီးလက်ဝ ကျေးရွာမှာ သူ့ဘဝ တလျှောက်လုံး အေးအေး ချမ်းချမ်း နေရမယ်လို့ ထင်ခဲ့ပေမယ့် တပ်မတော်နဲ့ရက္ခိုင်စစ်တပ် (AA) တို့ တိုက်ပွဲတွေဟာ မီးလက်ဝကျေးရွာနားထိ ရောက်လာတာကြောင့် မတ်လအတွင်းမှာတော့ သူတို့ တရွာလုံး ဘေးလွတ်ရာကို ပြေးခဲ့ကြရပါတယ်။

ရွာသူရွာသားအများစုက မီးလက်ဝ တဖက်ကမ်းက ပလက်ဝမြို့ပေါ်ကို ခိုလှုံဖို့ ပြေးကြပေမယ့် ဆွေမျိုးလည်း မရှိ၊ ခိုလှုံစရာ နေရာလည်း မရှိတာကြောင့် ဒေါ်ပြီတင်းကတော့ ရန်ကုန်ကို ထွက်ပြေးဖို့ ဆုံးဖြတ်ပြီး ရောက်လာတာ ဖြစ်ပါ တယ်။

ဒေါ်ပြီတင်းလိုမျိုး ပလက်ဝမှာ ဆက်နေဖို့ လုံခြုံတယ်လို့ မခံစားရတာကြောင့် ရန်ကုန်အထိ ပြေးလာကြတဲ့ ချင်းခူမီး ဒုက္ခသည်တွေ ရန်ကုန်မှာ ဦးရေ ၁၃၀ ကျော် ရှိပါတယ်။

ချင်းစစ်ဘေးရှောင်ပြည်သူများ အရေးပေါ် ကူညီရေးနှင့် ပြန်လည် ထူထောင်ရေး ကော်မတီ (RRCCI)က ရန်ကုန်တိုင်း ဒေသကြီး၊ မှော်ဘီမြို့နယ်ထဲက လယ်ကွင်းကျယ် တခုမှာ နေရာ ချထားပေးပြီး စစ်ဘေးရှောင်စခန်းတခု တည်ဆောက် ပေးထားပါတယ်။

ဒုက္ခသည်စခန်းထဲမှာ တချို့ကလည်း မိသားစုလိုက် ၇ ယောက် တစု၊ ၉ ယောက် တစုနဲ့ တပြုံတမကြီး ပြေးလာ နိုင်ကြ သူတွေ ရှိသလို မိသားစုတွေ တကွဲတပြား ကျန်ရစ်ပြီး ပြေးလာကြသူတွေလည်း ရှိနေပါတယ်။

တကယ်တော့ သူတို့အားလုံးက စစ်ဘေးရှောင်ဒုက္ခသည်တွေ မဖြစ်ခင်က ဘိုးဘွားစဉ်ဆက် ကုလားတန်မြစ် ကြောင်း တလျှောက် ပိုင်ဆိုင်ကြတဲ့ မြေတွေ တောင်ယာတွေမှာ လုပ်ကိုင်စားသောက်ရင်း ဘဝကို အေးအေးချမ်းချမ်း ဖြတ်သန်း နေကြတဲ့ သူတွေပါ။

ကုလားတန်မြစ်ကြောင်းတလျှောက်ကို မှီခိုပြီး ရွာစဉ်တွေ အလိုက် နေထိုင်ကြတဲ့ ချင်းခူမီးမျိုးနွယ်စုတွေဟာ ကုလား တန်မြစ်ကို မှီခိုရင်း သားငါးရှာ၊ မြစ်ကမ်းနံဘေးမြေမှာ ပဲနဲ့ သီးပင်စားပင်တွေ စိုက်၊ တောင်ကုန်းတွေပေါ်မှာ ရွာတည်၊ ရွာနောက် တကြောက တောင်ကြောတလျှောက်မှာ တောင်ယာလုပ်နဲ့ နေထိုင်ကြသူတွေပါ။

ချင်းခူမီးမျိုးနွယ်စု၊ အမျိုးသမီးကြီးတွေဆိုရင် နားမှာ ငွေသားနားတောင်းကြီးကို ဝတ်ဆင်ပြီး ငွေသားလို ပြောင်လက် နေတဲ့ ကြေးအိုးကြီးတွေနဲ့ သွားလာနေတာမျိုး၊ အမျိုးသားတွေ ကလေးငယ်တွေ ဆိုရင်လည်း မြစ်ကြောင်းတလျှောက် လှေကို ကျွမ်းကျွမ်းကျင်ကျင်စီးပြီး ငါးရှာကြတဲ့ လှုပ်ရှားမှုတွေဟာ ကုလားတန်မြစ်ရိုးတလျှောက်က သူတို့ ဘဝ ဓလေ့တွေ ဖြစ်ပါတယ်။

အခုတော့ တိုက်ပွဲကြောင့် မြေစာပင်ဘဝကို ရောက်ရကြပြီးနောက်မှာတော့ သူတို့ပိုင်ဆိုင်တာ ဘာမှ မရှိတော့ပါဘူး။

စစ်ဘေးရှောင်ဒုက္ခသည်ဆိုတဲ့ အမည်နဲ့ သစ်ရိပ်ဝါးရိပ်မရှိ၊ လယ်ကွင်းပြောင်ပြောင်မှာ သက်ကယ်မိုး၊ ဝါးထရံတွေ ခပ်ကျဲကျဲ ဆောက်ထားတဲ့ ခြေတံရှည်အိမ်ကလေးတွေမှာ မှီခိုနေကြရပါတယ်။

ဒေါ်ပြီတင်းက “ဒါအခု တော်တော်ကို ကောင်းသွားတာ။ ကျမတို့ စရောက်တုန်းကဆိုရင် ဘာမှကို မရှိလို့ ဒီတိုင်း နေပူထဲ လမ်းဘေးမှာ ၃ ရက်၊ ၄ရက် နေခဲ့ရတာ”လို့ ဆိုပါတယ်။

စစ်ဘေးရှောင်ဒုက္ခသည်စခန်း အခြေခံ အိမ်သုံး ပစ္စည်းတွေနဲ့ ထမင်း၊ ဟင်း ချက်ပြုတ်စားသောက်ဖို့ အိုးခွက်တွေကို တော့ RRCCI ကပဲ ထောက်ပံ့ပေးထားပါတယ်။

ပလက်ဝမှာလို လေယာဉ်တွေ မြေကြီးမှာ ဝပ်နေရတဲ့ အကြောက်တရားမျိုး၊ ရွာနားပတ်ဝန်းကျင်ကိုတောင် မ သွားရဲအောင် စိုးရိမ်ရတဲ့ အခြေအနေမျိုးနဲ့ တိုက်ပွဲကြား ပစ်ခတ်ခံရ၊ ပြေးရတာမျိုး တွေကို မကြုံရတော့ပေမယ့် ကျန်နေခဲ့တဲ့ မိသားစုနဲ့ ဆွေမျိုးတွေအတွက်တော့ ပူပန်နေကြရဆဲပါပဲ။

ဒေါ်ပြီတင်းဆိုရင် ပလက်ဝမှာ သူ့ခင်ပွန်းသည်နဲ့ သားသမီး ၂ ဦး ကျန်ခဲ့ပါတယ်။ သူ့ခင်ပွန်းနဲ့ သူ့သားသမီးတွေက အခုတော့ ပလက်ဝမြို့ပေါ်က စစ်ဘေးရှောင်စခန်းမှာ ခိုလှုံနေကြတာပါ ။

ပလက်ဝက အင်တာနက်ဖြတ်တောက်ခံထားရတဲ့ မြို့နယ်ဖြစ်တာကြောင့် မိသားစုတွေ အချင်းချင်း အွန်လိုင်းက တဆင့် ဗီဒီယိုဖုန်းခေါ်တာမျိုးတွေ လုပ်လို့ မရပေမယ့် ဖုန်းနဲ့တော့ နေ့တိုင်းနီးပါး ဆက်သွယ်ပြီး တဖက်နဲ့ တဖက် အခြေအနေတွေကို မေးမြန်းကြပါတယ်။

ပလက်ဝမှာ ကျန်ခဲ့တဲ့ ဒေါ်ပြီတင်းရဲ့ ၁၀နှစ် အရွယ်သားက ဖုန်းဆက်တိုင်း ရန်ကုန်က လုံခြုံလား၊ ပလက်ဝမှာလို တိုက်လေယာဉ်တွေ ရှိလားဆိုတာကို မကြာခဏ မေးမြန်းတတ်ပါတယ်။

“နောက်ပြီး အမေရယ် အမေ့ကို ဖုန်းခေါ်လို့လည်း မရဘူးတဲ့။ တခါတလေ ဖုန်းလိုင်းက မကောင်းဘူးတဲ့ ။ သားနဲ့ သမီးနဲ့ အဖေနဲ့ ထမင်းလည်း တခါတလေ မစားရဘူးတဲ့ ။ အမေက အဲဒီဘက်မှာ နေတော့ ထမင်းရောစားရလား။ မုန့်တွေရော စားရလားတဲ့။ ကျမ အရမ်းဝမ်းနည်းတယ်”လို့လည်း ဒေါ်ပြီတင်းက ပြောပြပါတယ်။

ပလက်ဝက ကုလားတန်မြစ်ကြောင်းကို အမှီပြုပြီး ရေကြောင်းက တဆင့် ရခိုင်ပြည်နယ်၊ ကျောက်တော်မြို့ကနေ အခြေခံ စားသောက်ကုန်၊ ဆန်၊ ဆီ၊ဆား တွေကို ဝယ်ယူ စားသုံးနေကြရတာပါ။

ဖေဖော်ဝါရီနဲ့ မတ်လအတွင်းမှာ တိုက်ပွဲတွေကြောင့် ရေလမ်းရော ကုန်းလမ်းပါ ပိတ်ဆို့သွားတော့ ပလက်ဝ ဒေသခံတွေလည်း ဆန်ပြတ်တောက်သွားသလို စစ်ဘေးရှောင်ဒုက္ခသည်တွေလည်း ဆန် မရှိတော့တဲ့ ဘဝကို ရောက်ခဲ့ကြပါသေးတယ်။

အဲဒီထဲမှာ ဒေါ်ပြီတင်းရဲ့ မိသားစုတွေလည်း ပါ ပါတယ်။

ရန်ကုန်က စစ်ဘေးရှောင်စခန်းမှာ နေ့စဉ် စားသောက်ရေး အဆင်ပြေပေမယ့် ပလက်ဝမှာ ကတော့ မတ်လတုန်းက တော်တော်ကို ခက်ခဲခဲ့ကြပါတယ်။

တခါက ပလက်ဝဘက်က ကျန်ရစ်ခဲ့တဲ့မိသားစုဆီကို ဖုန်းဆက်စကားပြောရင်း ပလက်ဝမှာ စားစရာ ဆန်ပြတ်လုနီးပါး ဖြစ်နေလို့ ခက်ခဲနေတဲ့ အကြောင်းနဲ့ ဟင်းမရှိတာကြောင့် ရှိတဲ့ ဆန်နဲ့ ဆားနဲ့ ရောချက်ပြီး စားလို့ ဝမ်းပျက် ဝမ်းလျော တွေ ဖြစ်ကြတဲ့ အကြောင်း ကြားလိုက်ရပြီးကတည်းက “ထမင်းစားပြီးပြီလား”ဆိုတဲ့ မေးခွန်းကို သူဘယ်တော့မှ မမေးတော့ဘူးလို့လည်း ဒေါ်ပြီတင်းက ဆိုပါတယ်။

သူ့မိသားစု အတူပြန်ဆုံဖို့ မိသားစုကို ပြန်ခေါ်နိုင်ဖို့လည်း ဒေါ်ပြီတင်းက မျှော်လင့်နေပါတယ်။

ရန်ကုန်မှာပဲ စက်ရုံအလုပ်ရှာလုပ်ပြီး ဝင်ငွေရှာဖို့နဲ့ တမိသားစုလုံး ရန်ကုန်ကို ရွှေ့ပြီး ကလေးတွေကိုလည်း ရန်ကုန်မှာပဲ ကျောင်းထားချင်လို့ သူကြိုးစားမယ်လို့လည်း ဆိုပါတယ်။

စစ်ဘေးရှောင် ဒုက္ခသည်စခန်းထဲမှာ ခိုလှုံနေကြတဲ့ ပလက်ဝဒေသခံတွေဟာ ပြေးလာကြတဲ့ အကြောင်းရင်းတွေ ကိုယ်စီနဲ့ပါပဲ။

ကျီးလေကျေးရွာက ပြောင်းပြေးလာကြတဲ့ ဦးကံထွန်းတို့ မိသားစုကတော့ မီးလက်ဝရွာလိုမျိုး တိုက်ပွဲတွေကြောင့် ပြေးရင်း ရန်ကုန်ကို ရောက်လာတာ မဟုတ်ပါဘူး။

ကျီးလေကျေးရွာထဲကို AA စစ်သားတွေ ဝင်လာပြီး အဓမ္မ ပစ္စည်းတွေ သယ်ခိုင်းတာ၊ တပ်ကို သတင်းပို့တယ်ဆိုပြီး မသင်္ကာ ဖြစ်လို့ တရွာလုံးကို လူစုပြီး ရိုက်နှက်တာ ကြိမ်းမောင်းတာတွေကြောင့် ကြောက်လန့်ပြီး သူတို့ရွာကို စွန့်ခဲ့တာ ဖြစ်ပါတယ်။

ကျီးလေကျေးရွာမှာ ရွာသားတွေကို ရိုက်နှက်ပြီးနောက်မှာတော့ AA ဘက်က သူတို့ မတရား လုပ်တာ မရှိကြောင်း သက်သေပြဖို့ ရုပ်သံမှတ်တမ်းတွေ လာရိုက်ယူ၊ ရိုက်နှက်ခံခဲ့ရတဲ့ ရွာသားတွေကို တောင်းပန်ကြောင်း လာပြောပေမယ့် ကျီလေရွာသားတွေ စိတ်ထဲမှာတော့ အကြောက်တရားက စွဲကျန်နေခဲ့ပါတယ်။

ဦးကံထွန်းက “ထပ်ပြီး လာရိုက်မှာကို ကြောက်တယ်။ သူတို့က နောက်ထပ် သတင်းပို့ရင် ရွာကို မီးရှို့မယ်။ တရွာလုံး ကို ပစ်သတ်မယ် ဘာညာဆိုတော့ ကျနော်တို့ ကြောက်လန့်တာပေါ့။ သူတို့က စကားလည်လည်ဝယ်ဝယ်တတ်တဲ့ လူဆိုလည်း လိုက်ခေါ်တယ်။ အဲဒီမှာ ဆက်နေရင် ကိုယ့် အသက်မစွန့်ချင်လို့ ထွက်ပြေးတာပါ” လို့ ပြောပြပါတယ်။

ဦးကံထွန်းက အသက် ၆၀ ကျော်ပြီဖြစ်လို့ အသက်ကြီးလို့ AA တပ်ဖွဲ့ဝင်တွေ ရိုက်နှက်မေးမြန်းတုန်းက အရိုက် မခံခဲ့ရပေမယ့် ရွာထဲမှာ ထပ်ပြီး မသင်္ကာမှုတွေ ဖြစ်လာခဲ့ရင် သူ့သား၊ သူ့သမီး တွေနဲ့ မြေးတွေ တခုခုဖြစ်မှာကို စိုးရိမ်တာကြောင့်လည်း ထွက်ပြေးဖို့ စဉ်းစားခဲ့တာလို့ သိရပါတယ်။

တကယ်တော့ ကျီးလေ ရွာသားတွေက ရွာထဲမှာ AA တပ်ဖွဲ့တွေ ရောက်နေတဲ့ အကြောင်းနဲ့ ရိက္ခာတွေ သယ်ယူ နေတဲ့ အကြောင်းကို သတင်းပို့ခဲ့တာ မရှိပါဘူး။

အရက်မူးနေတဲ့ ရွာသားတယောက်က အဓမ္မပစ္စည်းသယ်ခိုင်းတာ တပ်ကို တိုင်မယ်လို့ မူးမူးနဲ့ ပြောခဲ့တာကြောင့် တရွာလုံး သံသယဖြစ်ခံခဲ့ကြရပြီး ရိုက်နှက်ခံခဲ့ရတာ ဖြစ်ပါတယ်။

ကျီးလေရွာထဲက တယ်လီဖုန်းဆိုင်ပိုင်ရှင်ဆိုလည်း ရိုက်ခံရတဲ့ ဒဏ်ရာတွေ ရရှိတာကြောင့် ပလက်ဝမြို့မှာ ဆေးကုခဲ့ရပါသေးတယ်။

တယ်လီဖုန်းဆိုင်ပိုင်ရှင်လည်း ရွာကို မပြန်ရဲတော့တာကြောင့် ဆွေမျိုးတွေရှိတဲ့ အခြားဒေသ တခုကို တိမ်းရှောင် သွားတယ်လို့ သိရပါတယ်။

ဦးကံထွန်းကတော့ ရန်ကုန်ကို သူ့သား၊ သမီး၊ ချွေးမ၊ မြေးတွေ အားလုံးကို ခေါ်ပြီး စုစုပေါင်း မိသားစုဝင် ၉ ဦးလုံး ပြောင်းလာကြတာပါ။

ရွာကနေ ထွက်ပြေးတာကို AA တပ်ဖွဲ့ဝင်တွေ သိရင် ဟန့်တားတာ ထွက်ခွင့်မပေးတာမျိုး ကြုံရမှာ စိုးရိမ်တာ ကြောင့်လည်း ထွက်ပြေးတုန်းက အထုပ်အပိုးတွေ သိပ်မသယ်ပဲ ပလက်ဝမြို့ကို အလည်အပတ် သွားသလိုနဲ့ ထွက်လာခဲ့ကြတာလို့ သူ့ရဲ့စိုးရိမ်မှုကို ဦးကံထွန်းက ပြောပါတယ်။

ဦးကံထွန်းက “ရွာက လူတွေတောင် မသိဘူး။ ကိုယ့်ညီအစ်ကိုလောက်ပဲ ပြောခဲ့တာ။ ကျနော် ထွက်ပြေးတော့မယ်။ မနေနိုင် တော့ဘူးလို့ ပြောပြီး ပြေးခဲ့တာ။ ပစ္စည်းတွေလည်း ကျန်ခဲ့တယ်။ အဝတ်အစားနဲ့ပဲ ပြေးလာတာ” လို့လည်း ဆက်ပြောပါတယ်။

သူ့ရဲ့ အိမ်၊ သူတို့ မိသားစုရဲ့စီးပွားရေး အားလုံးဟာ ကျီးလေရွာမှာပဲ ကျန်ခဲ့ပါတယ်။ ဦးကံထွန်းတို့ မိသားစုအနေနဲ့ ပလက်ဝမြို့ပေါ်ကို ပြောင်းပြေးရင်လည်း တိုက်ပွဲတွေရဲ့ စက်ကွင်း မလွတ်နိုင်တာကတကြောင်း၊ သားသမီးနဲ့ မြေးမြစ်တွေ အတွက် အလုံခြုံဆုံး၊ အဝေးဆုံး ဘယ်တပ်ဖွဲ့မှ လိုက်လာပြီး ဒုက္ခပေးလို့ မရတဲ့ နေရာ၊ အကြောက်တရား တွေနဲ့ နေထိုင်ဖို့ မလိုတဲ့ အရပ်၊ ရန်ကုန်ကို ပြောင်းလာခဲ့တာလို့လည်း ဆိုပါတယ်။

ဆက်ပြီး ဦးကံထွန်းက “အေးချမ်းရင်တော့ ကိုယ့်ရွာကိုယ် ပြန်ချင်တာပေ့ါ။ ပစ္စည်းတွေလည်း ကျန်ခဲ့တာလေ။ သတိ လည်း ရတယ်”လို့ ဆိုပါတယ်။

ဒုက္ခသည်တဦးဖြစ်တဲ့ ဘာသာရေးဆရာ ဦးကံလွတ်ကတော့ ပလက်ဝကို ပြန်မယ်ဆိုရင်တောင် သူတို့မှာ ပိုင်ဆိုင်မှု ဘာမှ မရှိတော့ဘူးလို့ပြောပါတယ်။

တပ်မတော်စစ်ကြောင်းတွေက ရွာတွေထဲကို ဝင်ရင် သူတို့ကျန်ခဲ့တဲ့ ပစ္စည်းတွေကို ယူသွားပြီ ဆိုတဲ့ သတင်းတွေ ကြောင့် ရွာမှာ ဘာမှကျန်တော့မှာ မဟုတ်ဘူးလို့လည်း သူက ပြောပါတယ်။

မေ ၂၆ ရက်မှာတော့ အောက်မီးလက်ဝကျေးရွာသားတွေ ထပ်ပြီး ကံဆိုးပြန်ပါတယ်။ သူတို့ ထွက်ပြေးလာခဲ့တဲ့ ရွာ၊ လူမရှိပဲ အိမ်နဲ့အိမ်တွင်း ပစ္စည်းတွေသာ ကျန်ခဲ့တဲ့ ရွာက မီးရှို့ခံရပါတယ်။ ဦးကံလွတ် အနေနဲ့ ဝမ်းနည်းပြီး မျက်ရည်ကျရုံက လွဲလို့ ဘာမှ မတတ်နိုင်ပါဘူး။

“ကျနော်တို့ အဝတ်အစားကအစ ဘာမှ မယူပဲ သေတ္တာတွေနဲ့ ထားခဲ့တာ။ အခု မီးလောင်ပြီဆိုတော့ အကုန် ပါသွားပြီ”လို့ ပြောပါတယ်။

အခြေအနေ အေးချမ်းရင် အိမ်ကို ပြန်ကြမယ်ဆိုတဲ့ မျှော်လင့်ချက်တောင် ပျောက်သလို ဖြစ်သွား ကြပါတယ်။

ပလက်ဝတဖက်ကမ်းက စစ်ဘေးရှောင်ဒုက္ခသည်တွေက အောက်မီးလက်ဝကျေးရွာ မီးလောင်နေတုန်း မီးငြှိမ်းဖို့ တဖက်ကမ်းကို လှေနဲ့ ကူးကြပေမယ့် ခြောက်လှန့် ပစ်ခတ် ခံခဲ့ရတာကြောင့် မီးရှို့ခံရတာကို ဒီအတိုင်း ကြည့်နေ ခဲ့ကြရတာပါ။

ရွာသားတွေကတော့ မီးလောင်ချိန်မှာ တပ်မတော်၊ စစ်ကြောင်းတွေကို အောက်မီးလက်ဝရွာ နားမှာ တွေ့တာကြောင့် တပ်မတော်က မီးရှို့တာလို့ စွပ်စွဲပြောဆိုကြပါတယ်။

တပ်မတော်ကတော့ AA ရှို့တာလို့ ပြန်စွပ်စွဲပြီး AA ကလည်း တပ်မတော် ရှို့တာဆိုပြီး အပြန်အလှန် စွပ်စွဲ ထားပါတယ်။

လက်သည်မပေါ်ပေမယ့် စစ်ဘေးရှောင်ဒုက္ခသည်တွေကတော့ သူတို့နေရပ်ရင်းရွာကိုတောင် ဆုံးရှုံးလိုက်ရပါပြီ။

အိမ်တွေ ဆုံးရှုံးလို့မှ မကြာသေးပေမယ့် မေ ၂၉ ရက်မှာ အောက်မီးလက်ဝရွာနား ထင်းကောက်ဖို့သွားတဲ့ စစ်ဘေးရှောင် အမျိုးသမီးတဦး ပစ်သတ်ခံခဲ့ရပြန်ပါတယ်။

ဘိုးဘွားစဉ်ဆက် ပိုင်ဆိုင်လာတဲ့ ကျေးရွာထဲကိုတောင် ပြန်သွားလာဖို့ မဖြစ်နိုင်တော့တဲ့ အခြေအနေ ဖြစ်နေပါတယ်။

ရန်ကုန်က စစ်ဘေးရှောင်ဒုက္ခသည်တွေကတော့ ပလက်ဝကို လက်ရှိအခြေအနေမှာ ပြန်လို့ မရတာ သေချာနေတာ ကြောင့် လတ်တလောမှာတော့ ဒုက္ခသည်စခန်းမှာပဲ မှီခိုပြီး ရန်ကုန်မှာပဲ စက်ရုံ၊ အလုပ်ရုံတွေမှာ အလုပ်ရှာကြမယ်လို့ ဆိုပါတယ်။

သူတို့ဘဝက ရန်ကုန်က စစ်ဘေးရှောင်ဒုက္ခသည်စခန်းထဲမှာ လုံခြုံနေပေမယ့် ရေရှည်မှာ တဘဝလုံး အတွက်ကတော့ ဒုက္ခသည်အဖြစ် မှီခိုနေလို့ မဖြစ်တာကြောင့် စားဝတ်နေရေး အတွက် ဝင်ငွေရှာကြရဦးမှာ ဖြစ်ပါတယ်။

ပလက်ဝမှာ နေတုန်းကတော့ ကိုယ်ပိုင်အိမ်၊ ကိုယ်ပိုင်မြေ၊ ကိုယ်ပိုင်တောင်ယာနဲ့ စားဝတ်နေရေး၊ ငွေရေးကြေရေးကို အပူအပင်မရှိဘဲ ဖြတ်သန်းခဲ့ကြသူတွေပါ။

အခုတော့ စစ်ဘေးဒဏ်ကြား ထွက်ပြေးရင်း အကြောက်တရားတွေ ကျည်ဆန်တွေ နဲ့ ဗုံးလာကျဲမယ့် လေယာဉ်တွေ မရှိတဲ့ အရပ်၊ ရန်ကုန်မြေမှာ ဘဝကို သုညကနေ ပြန်စကြရတော့မှာ ဖြစ်ပါတယ်။

ဆက်စပ်လင့် 

ကိုဗစ်-၁၉ ကြောင့် ချင်းပြည်နယ် ပထမဆုံးလေယာဉ်ကွင်း ဖွင့်ရန် နှောင့်နှေးနေ

The post ဘဝကို သုညက ပြန်စရမယ့် ရန်ကုန်ရောက် ချင်းဒုက္ခသည်များ appeared first on ဧရာဝတီ.

ကမ္ဘာ့ ရောဂါကပ်ပိုး ကိုဗစ်-၁၉ ရောဂါသည် အခြားနိုင်ငံများနည်းတူ မလေးရှားနိုင်ငံသို့ ၂၀၂၀ ခုနှစ် ဇန်နဝါရီလ ၂၅ ရက်နေ့တွင် ရောက်ရှိလာခဲ့သည်။ လက်ရှိအချိန်တွင် မလေးရှားနိုင်ငံတွင် ၇၈၇၇ ဦး ရောဂါကူးစက်ခံထားရပြီး ၆၄၇၀ ဆေးကုသပျောက်ကင်းခဲ့ပြီး ၁၁၅ ဦး သေဆုံးခဲ့ပြီးဖြစ်ပါသည်။ ကိုဗစ်ရောဂါပိုး ပြန့်ပွားမှုကို ထိန်းချုပ်နိုင်ရန် မလေးရှားအစိုးရအနေဖြင့် မတ်လ ၁၈ ရက်မှစပြီး ရက်သတ္တပတ် ၂ ပတ် လှုပ်ရှားမှုကို စတင်ခဲ့ပါသည်။

မလေးရှားနိုင်ငံသည် လူဦးရေ ၃၂ သန်း ကျော်ရှိပြီး အရှေ့တောင်အာရှနိုင်ငံများ၏ တတိယမြောက် စီးပွာရေး အကောင်းဆုံးနိုင်ငံတခုဖြစ်သည်။ တရားဝင် ရွှေ့ပြောင်းအလုပ်သမား ၂.၂ သန်းခန့်နှင့် အထောက်အထားမဲ့ (တရားမဝင်) ရွှေ့ပြောင်းအလုပ်သမားများနှင့် ၎င်းတို့၏ မိသားစုများ ၃.၃ သန်းရှိသည်ဟု အလုပ်သမားအရေးဆောင်ရွက်နေသည့် အဖွဲ့အစည်းများအဆိုအရ သိရပါသည်။

မလေးရှားနိုင်ငံတွင် မြန်မာရွှေ့ပြောင်းအလုပ်သမား ၃ သိန်းမှ ၅ သိန်းခန်ံ့အထိ အလုပ်လုပ်ကိုင်နေကြသည်ဟု အလုပ်သမားအရေးဆောင်ရွက်နေသူများက ဆိုကြသည်။ မြန်မာရွှေ့ပြောင်းအလုပ်သမားအများစုသည် စက်ရုံများ၊ ဆောက်လုပ်ရေးလုပ်ငန်းများ၊ စိုက်ပျိုးရေးလုပ်ငန်းများ၊ စားသောက်ဆိုင်လုပ်ငန်းများ၊ သန့်ရှင်းရေးလုပ်ငန်းများတွင် အများဆုံး ဝင်ရောက်လုပ်ကိုင်နေကြ၏။

ကိုဗစ်ရောဂါ ထိန်းချုပ်ကာကွယ်နိုင်ရန် မလေးရှားနိုင်ငံတွင် မတ်လ ၁၈ ရက်နေ့နောက်ပိုင်း အလုပ်ရုံများ၊ စားသောက်ဆိုင်များ ပိတ်ထားခဲ့မူ့ကြောင့် ထောင်၊သောင်းချီသည့် မြန်မာရွှေ့ပြောင်းအလုပ်သမားများ အလုပ်ပြုတ်ခဲ့ကြရသည်။ အဓိကအားဖြင့် မြို့ ပြစားသောက်ဆိုင်လုပ်ငန်း၊ စက်ရုံနှင့် သန့်ရှင်းရေး လုပ်ငန်းများတွင် လုပ်နေသည့်မြန်မာအလုပ်သမားအများစု အလုပ်ပြုတ်ခဲ့သည်။

“ကျနော်တို့က တလရတဲ့လစာကို လစဉ်မြန်မာနိုင်ငံကို ပြန်ပို့နေခဲ့တာ၊ ကျနော်တို့မှာ စုဆောင်ထားတာ မရှိပါဘူး၊ လကုန်ရင် အိမ်လခမပေးနိုင်တော့လို့ အိမ်ရှင်က နှင်ချနေပြီ၊ တချို့အလုပ်သမားတွေကတော့ သူတို့ သူငယ်ချင်းတွေနဲ့ စုနေကြတယ်။ ကျနော်တို့ တော့ ဘယ်မှာ နေရမှန်း မသိသေးပါဘူး”ဟု မကွေးတိုင်းဒေသကြီး ပခုက္ကူမြို့နယ်မှ ကိုမင်းမင်းကပြောပြသည်။

မလေးရှားနိုင်ငံအခြေစိုက် Tenaganita အမျိုးသမီးများနှင့် အလုပ်သမားအခွင့်အရေးအဖွဲ့၏ အမှုဆောင်ညွှန်ကြားရေးမှူး Ms Glorene Das က ရွှေ့ပြောင်းအလုပ်သမားများအကြား Covid-19 ကူးစက်မှုအသစ်ဖြစ်ပေါ်နိုင်မှုသည် အလွန်စိုးရိမ်ဖွယ်ဖြစ်ကြောင်း The Straits Times သတင်းစာကို ပြောကြားခဲ့သည်။ ၎င်းမှာ ဆက်လက်ပြီး “ရွှေ့ပြောင်းအလုပ်သမားများအနေနဲ့ ပိုပြီး ရောဂါကူးစက်ခံရဖို့ ဖြစ်နိုင်ပါတယ်။ သူတို့ဟာ လူစုလူဝေးနှင့် နေထိုင်သူများဖြစ်ကြပြီး၊ အစိုးရလမ်းညွန်ထားတဲ့အတိုင်း တဦးနှင့် တဦး ဝေးဝေးနေဖို့ မဖြစ်နိုင်ပါဘူး။ စာရွက်စာတမ်းအထောက်အထားမရှိတဲ့ အလုပ်သမားတွေကလည်း ဖမ်းဆီးခံရမှာ စိုးရိမ်ကြတာကြောင့် ဆေးစစ်ဖို့ ငြင်းဆန်တာတွေလည်း ရှိနေပါတယ်” ဟု ဆိုသည်။

သဘာဝဘေးအန္တရယ် ကျရောက်၍ဖြစ်စေ၊ လူလုပ်သည့် အန္တရယ်များ ကျရောက်ခြင်းများဖြစ်စေ၊ ရွှေ့ပြောင်းအလုပ်သမားများအနေဖြင့် ဒေသခံ နိုင်ငံသားများထက် ပိုပြီး ခက်ခဲကြမ်းတမ်းမူ့များနှင့် ယှဉ်ဆိုင်ရလေ့ရှိသည်။ ထိုနည်းတူစွာပင်မလေးရှားနိုင်ငံရောက် မြန်မာရွှေ့ပြောင်းအလုပ်သမားများနေနှင့် ကိုဗစ်ရောဂါကူးစက်ခံရမည်ကို ကြောက်ရွံ့ခြင်းထက် အစာရေစာ၊ပြတ်တောက်ခြင်း၊ နေစရာအခက်အခဲများ ဖြစ်ပေါ်လာမည်ကို စိုးရိမ်ခြင်းတို့က ပိုပါသည်။ တချို့ မှာ ကိုယ်ဝန်ဆောင်မိခင်များ ဖြစ်ကြသည်။ ရက်ကြာလာသည်နှင့်အမျှ စားဝတ်နေရေးအခက်အခဲများ ပိုပြီး ယှဉ်ဆိုင်နေကြရ၏။

“သမီးတို့ကို မြန်မာပြည်အမြန်ဆုံး ပြန်လို့ ရအောင် ကူညီပေးပါ၊ ဒါမှမဟုတ်လည်း၊ လူပွဲစားတွေ (လူပို့တဲ့လူတွေ) နဲ့ပဲဖြစ်ဖြစ် ဆက်သွယ်ပေးပါလား။ ကျမတို့ ဒီအတိုင်းနေရင် ပိုပြီးဒုက္ခရောက်လိမ့်မယ်” ဟု ကိုယ်ဝန် ၄ လရှိပြီဖြစ်သည့် မြောက်ဦးသူ ရခိုင်အမျိုးသမီးငယ်က သူမ၏အခက်အခဲကို ပြောပြသည်။

မလေးရှားနိုင်ငံမှ ရွှေ့ပြောင်းအလုပ်သမားများအနေဖြင့် ထိုင်းနိုင်ငံတွင် ပိတ်မိနေသည့် မြန်မာရွှေ့ပြောင်းအလုပ်သမားများနှင့် နှိုင်းယှဉ်လျှင် ပိုပြီး ဆိုးဝါးနိုင်ပါသည်။ မလေးရှားနိုင်ငံတွင် ထိုင်းနိုင်ငံနှင့်မတူ မြန်မာရွေ့ပြောင်းအလုပ်သမားများကာကွယ်ပေးနေသည့် အဖွဲ့အစည်းများက အကန့်အသတ်ရှိသည်။ မြန်မာပြည်သို့ ပြန်မည်ဆိုပါကလည်း ထိုင်းနိုင်ငံလောက် မလွယ်ကူပါ၊ ထိုင်းနိုင်ငံတွင် ဒုက္ခရောက်နေသည့်မြန်မာနိုင်ငံသားများအနေဖြင့် မြန်မာနိုင်ငံသို့ မဖြစ်မနေပြန်လိုပါက လမ်းလျှောက်ပြန်၍ပင် ရနိုင်သည်။

မလေးရှားရှိ ရွှေ့ပြောင်းအလုပ်သမား အများစုအဖို့ အိမ်ပြန်လိုလျင် ယခင်က အဖမ်းခံပြီး မလေးရှား-ထိုင်းနယ်စပ်သို့ ပြန်အပို့ခံကြသည်။ ယင်းမှတဆင့် ထိုင်းလဝကက ထိုင်း-မြန်မာနယ်စပ်သို့ ပြန်ပို့ပေးသည်။ ယခု ယင်းလမ်းကြောင်း ပိတ်သွားပြီ ဖြစ်သည်။ အကြောင်းမှာ မကြာသေးမီက မလေးရှားဘက်မှ လွှဲပြောင်းပေးသော မြန်မာရွှေ့ပြောင်းအလုပ်သမားများတွင် ကိုရိုနာဗိုင်းရပ်စ် တွေ့ရှိရအပြီး ထိုင်းလဝကက ထပ်မံလက်ခံရန် ငြင်းဆိုနေသောကြောင့် ဖြစ်သည်။

ယင်းသို့ လမ်းပျောက်နေချိန် မကွေးတိုင်းဒေသကြီး၊ပွင့်ဖြူမြို့နယ်၊ မဒဲကျေးရွာမှ ကိုအောင်မြင့်မြတ်က “ ကျနော်တို့ အနေနဲ့ ဘယ်လိုမှရပ်တည်လို့ မရနိုင်ပါဘူး။ ဒီထဲမှာမှ ကိုယ်ဝန်ဆောင်သည်တွေ၊ အိမ်လခမပေးနိုင်တဲ့ သူတွေ၊ လွန်ခဲ့တဲ့ နှစ်လပိုင်းတုန်းကမှ ရောက်လာသူတွေ များပြားလွန်းတဲ့အတွက် တချို့ဆို ဘုန်းကြီးကျောင်းတွေမှာ အကူအညီတောင်းပြီး မှီခိုနေကြရပါတယ်၊ ဘုန်းကြီးကျောင်းမရှိတဲ့ နေရာတွေမှာရောက်နေသူတွေအတွက်တော့ မတွေးဝံ့စရာအခြေနေပါ။ ဒါကြောင့်မို့ နိုင်ငံတော်သမ္မတကြီးနှင့် အမေဒေါအောင်ဆန်းစုကြည်အား မေတ္တာရပ်ခံအပ်ပါတယ်” ဟု ၎င်း၏လူမှုကွန်ယက်စာမျက်နှာတွင် ရေးသားခဲ့ပါသည်။

မလေးရှားတွင် ဒုက္ခရောက်နေသည့် မြန်မာအလုပ်သမား ၄၀၀ ကျော်သည် ၎င်းတို့ ကို နေရပ်ပြန်နိုင်ရေး ကူညီဆောင်ရွက်ပေးပါရန်၊ ဖုန်းများ၊ ဗိုက်ဘာနှင့် လူမူ့ကွန်ယက်များမှ တဆင့် ဆက်သွယ်အကူအညီတောင်းခံနေပါသည်။ မိမိတို့အနေနှင့်လည်း နိုင်ငံတော် အတိုင်ပင်ခံအပါအဝင် မကွေးတိုင်းဒေသကြီး အစိုးရအဖွဲ့ဝန်ကြီးချုပ်၊ အလုပ်သမားဝန်ကြီး၊ လွတ်တော်ဒုတိယဥက္ကဌနှင့် အမျိူးသားလွတ်တော် လူဝင်မူကြီးကြပ်ရေးနှင့် ပြည်တွင်းပြည်ပအလုပ်သမားရေးဆိုင်ရာကော်မီတီများသို့ မလေးရှားနိုင်ငံတွင် ဒုက္ခရောက်သောင်တင်နေသည့် မြန်မာရွှေ့ပြောင်းအလုပ်သမားများအား ကူညီပေးရန် မေတ္တာရပ်ခံ စာပေးပို့ထားပါသည်။

နိုင်ငံတော်၏အတိုင်ပင်ခံ ဒေါ်အောင်ဆန်းစုကြည်က အွန်လိုင်း တွေ့ဆုံဆွေးနွေးပွဲတခုတွင် “တရားဝင်သည်ဖြစ်စေ၊ တရားမဝင်သူဖြစ်စေ၊ ကိုယ့်မြန်မာနိုင်ငံသားတွေ ဒုက္ခ ဖြစ်ရင်တော့ ကူညီရမှာဘဲ” ဟုပြောကြားခဲ့ဖူး၏။ နိုင်ငံတော်အတိုင်ပင်ခံ၏ လမ်းညွှန်ချက်ချက်အတိုင်း မလေးရှားနိုင်ငံတွင် ဒုက္ခခံစားနေရသည့် မြန်မာရွှေ့ပြောင်းအလုပ်သမားများကို အမြန်ဆုံး ကူညီပေးပါရန် တိုက်တွန်းနှိုးဆော်အပ်ပါသည်။

(ထူးချစ်သည် ရွှေ့ပြောင်းအလုပ်သမားများအရေး ဆောင်ရွက်နေသော ထိုင်းနိုင်ငံ အခြေစိုက် ပညာရေးနှင့် ဖွံ့ဖြိုးတိုးတက်ရေး ဖောင်ဒေးရှင်း (ထိုင်းနိုင်ငံ) အဖွဲ့၏ အမှုဆောင်ဒါရိုက်တာ ဖြစ်သည်)

You may also like these stories:

နိုင်ငံတော်၏ ကာကွယ်စောင့်ရှောက်မှုကို ရွှေ့ပြောင်းအလုပ်သမားများလည်း ရသင့်သည်

ရွှေ့ပြောင်းအလုပ်သမားတွေ အိမ်ပြန်လာကြတဲ့အခါ

ရွှေ့ပြောင်းအလုပ်သမားများ မဲပေးပိုင်ခွင့်သည် နိင်ငံသားအခွင့်အရေး ဖြစ်သည်


The post မလေးရှားရောက် မြန်မာရွှေ့ပြောင်းအလုပ်သမားများကိုလည်း ကူညီပါ appeared first on ဧရာဝတီ.

လူရွှင်တော် တော့ပ်က ဇနီးဖြစ်သူနဲ့ လင်မယားချင်း စကားများရာကနေ အိပ်ပျော်နေစဉ်မှာ ဇနီးဖြစ်သူက သူ့အား ရေနွေးပူနဲ့ လောင်းချခဲ့ပြီး ရေနွေးပူလောင်ထားတဲ့ ဒဏ်ရာများကြောင့် တော့ပ်ဟာ ဆေးရုံမှာ တက်ရောက်ကာ ဆေးကုသမှု ခံယူနေရပါတယ်။

“ကျနော်တို့ ဆေးရုံတက်နေတာ ၁၁ ရက် ရှိပြီ။ ဆေးရုံဆင်းရဖို့ကတော့ အနာတွေက မသက်သာသေးတော့ ဆင်းရမယ် မပြောသေးဘူး။ ကျောတွေမှာရောဆိုတော့ အနာတွေက မခြောက်သေးဘူး။ အခုတော့ သက်သာပါတယ်။ ဆရာဝန်တွေကလည်း ဂရုစိုက်ပါတယ်။ ဆေးရင်တော့ ဆင်းရမှာပါ။ ကျနော်အခုလို ဖြစ်ချိန်မှာ ကူညီပေးကြတာလည်း ကျေးဇူးတင်ပါတယ်”

“ကိုဗစ် မတိုင်ခင်ထိ ပွဲက ကရတယ်။ ကိုဗစ်တွေ ဖြစ်တော့ ပွဲတွေ မကရတော့ စကားလေး နည်းနည်း များကြတယ်။ စကား နည်းနည်းလည်း အမှားပါသွားတယ်။ ည ၁၂ နာရီလောက် ရေနွေး ဆန် ၆ လုံးအိုးနဲ့ တည်ပြီးတော့ အိပ်ပျော်နေချိန် လောင်းချလိုက်တာပဲ။ ၂ ခါ လောင်းခံလိုက်ရတယ်။ အရင်တုန်းက စကားကတော့ မကြာမကြာ များတယ်။ ဒီတခါဖြစ်တာကတော့ တော်တော်ဆိုးသွားတာပေါ့”လို့ လူရွှင်တော် တော့ပ်က ဧရာဝတီကို ပြောပါတယ်။

ရေနွေးပူလောင်ဒဏ်ရာ သက်သာသွားရင် သာသနာ့ဘောင်ထဲသို့ ဝင်ကာ ဘုန်းကြီးဝတ်ဖို့ ရှိသလို အနုပညာတွေလည်း ပြန်လုပ်ကိုင်သွားမယ်လို့ တော့ပ်က ဆိုပါတယ်။

“ကျနော်ကတော့ ဇွဲမလျှော့ဘူး။ ရောဂါတွေလည်း သက်သာရင် ဘုန်းကြီးဝတ်မယ်။ သက်သာရင် နွေဘက်ကျရင်တော့ ပြန်ကရမှာပဲ။ အနုပညာသမားဆိုတော့ အနုပညာကို လုပ်ချင်သေးတာ”လို့ တော့ပ်က ပြောပါတယ်။

ကျူးလွန်ခဲ့သူ အမျိုးသမီးကိုတော့ အမှုဖွင့်ထားရပြီး အိမ်ထောင်ရေးနဲ့ ပတ်သက်လို့လည်း တော့ပ်က အခုလို ဆိုပါတယ်။

“အခုတော့ သူ့ကို ထောင်ချထားတယ်။ သားသမီးရှိတာ တယောက်က အိမ်ထောင်ကျသွားပြီ။ တယောက်ကလည်း အားကိုးမရပါဘူး။ ကျနော်တောင် အခု ကျနော့်မွေးစား အဖေရဲ့သားက လာပြုစုပေးနေတာ။ ကလေးတွေကလည်း စရိုက် မကောင်းဘူး။ အဖေဘက် မပါကြဘူး။ အဲ့မိန်းမကို ပေါင်းလည်း မပေါင်းတော့ဘူး။ အင်္ကျီတွေလည်း အပြည့်အဝ မပေးလိုက်ဘူး။ ကောင်းလာရင်လည်း ပြန်မပေါင်းဘူး။ ဒီဘဝ ဒီမျှနဲ့ပဲ တော်ပါပြီ”လို့ ဆိုပါတယ်။

ရေနွေးပူနဲ့ လောင်းခဲ့တဲ့ ဇနီးဖြစ်သူကို လူရွှင်တော် တော့ပ်ရဲ့ ဆန္ဒအတိုင်း ညောင်လေးပင် ရဲစခန်းမှာ အမှုဖွင့် တိုင်ကြားထားကြောင်း သိရပါတယ်။ လူရွှင်တော် တော့ပ်ဟာ ကွယ်လွန်သွားပြီဖြစ်တဲ့ ဟာသ သရုပ်ဆောင်၊ လူရွှင်တော် မော့စ်နဲ့ ရုပ်တူတဲ့ လူရွှင်တော် တဦးလည်း ဖြစ်ပါတယ်။

You may also like these stories:

“ကျောင်းဖွင့်ရင် ကြိုပို့လုပ်ရမယ့် လူကြီးတွေအတွက်လည်း စိတ်ပူတယ်”

Daejong ရုပ်ရှင်ဆုပေးပွဲမှာ ဆု ၅ ဆု ရခဲ့တဲ့ “Parasite”

သင်ဇာဝင့်ကျော်နဲ့အတူ Gym ကစားနေတဲ့ အဆိုတော် မီးနို

The post လင်မယားချင်း စကားများပြီး ရေနွေးပူနဲ့ လောင်းခံခဲ့ရတဲ့ လူရွှင်တော် တော့ပ် appeared first on ဧရာဝတီ.

စာရေးဆရာမကြီး မစန္ဒာရဲ့ “ဂျီဟောသူ” ဝတ္ထုကို ပြန်လည် ပုံဖော်ရိုက်ကူးထားတဲ့ “ဂျီဟောသူ” ဇာတ်လမ်းတွဲကို မကြာခင် MRTV-4 ရုပ်သံလိုင်းကနေ ထုတ်လွှင့်ပြသတော့မယ်လို့ သိရပါတယ်။

ဒီဇာတ်လမ်းတွဲမှာတော့ ၁၉၈၀ ခုနှစ်က ကျောင်းသား၊ ကျောင်းသူများရဲ့ ပုံစံများကို မြင်တွေ့ရမှာဖြစ်ပြီး ပါဝင်သရုပ်ဆောင်ကြတဲ့ သရုပ်ဆောင်များကလည်း အဝတ်အစား ဖက်ရှင် ဆံပင်ပုံစံများကအစ ပြောင်းလဲထားတာကို တွေ့ရမှာ ဖြစ်ပါတယ်။

အခုခေတ်နဲ့ ကွဲပြားတဲ့ အပြင်အဆင်များ၊ ဖက်ရှင်ဒီဇိုင်းများကို မြင်တွေ့ရမှာဖြစ်ပြီး ဝတ္ထုကောင်းတပုဒ်ဖြစ်ခဲ့တာကြောင့်လည်း ဇာတ်လမ်းတွဲအနေနဲ့ ပြန်လည် ပုံဖော်တာကို စောင့်ကြည့်ရမယ့် ဇာတ်လမ်းတွဲလည်း ဖြစ်ပါတယ်။

“ဂျီဟောသူ” ဇာတ်လမ်းတွဲမှာတော့ MRTV-4 မှ ပရိသတ် ကြိုက်နှစ်သက်ပြီးသား သရုပ်ဆောင်များအပြင် အစီအစဉ် တင်ဆက်သူများကလည်း ပါဝင်သရုပ်ဆောင်ထားတာကို တွေ့ရမှာပါ။

ပါဝင်သရုပ်ဆောင်ကြမယ့် သရုပ်ဆောင်များကိုလည်း သရုပ်ဆောင်ရမယ့် ကာရိုက်တာအရ Training များပေးကာ အကြိုလေ့ကျင့် ပြင်ဆင်မှုများစွာလည်း ပြုလုပ်ခဲ့တယ်လို့ “ဂျီဟောသူ” ဇာတ်လမ်းတွဲထဲမှာ ပါဝင်သရုပ်ဆောင်သူတဦးက ဆိုပါတယ်။

“ဂျီဟောသူ” ဇာတ်လမ်းတွဲမှာတော့ ဟိန်းထက်၊ ရှင်မွေလ၊ မိုက်မိုက်၊ ဝေယံလင်း၊ ဘုန်းဆက်သွင်၊ သူရမောင်ချို၊ လပြည့်၊ မင်းဇေ၊ စိုးထွန်းဝင်း၊ မှူးသီဟသူ၊ အံ့ဝင့်ထွဋ်၊ ထွန်းနောင်ဆင့်၊ သုတအောင်၊ ဇော်ထက်၊ ခွန်ဆိုင်း၊ မေမီကိုကို၊ ဂရိတ်ချမ်း၊ ဖြိုးသံသာချို၊ ဆုမွန်၊ ရွှေစင်ဝင့်ရှိန်၊ ဈူးဈူးဈာန်၊ ဟန်နလာ၊ ဝိုင်းရွှေရည်၊ လဝန်းထက်၊ ဖြိုးမေစံ၊ နေရည်ဝင်းလဲ့၊ သီတာမိုမို၊ ခင်မို့မို့အောင်နဲ့ အခြား သရုပ်ဆောင်များစွာ ပါဝင်တယ်လို့ သိရပါတယ်။

ဆရာမကြီး မစန္ဒာရဲ့ ဝတ္ထုကိုတော့ အေးကြည်သာဟန်၊ အေးစန္ဒာဝင်း၊ ဆုဆုစံပယ်ဖူး တို့က ဇာတ်ညွှန်း ရေးသားထားပြီး ဒါရိုက်တာ ထွန်းထက်အာကာဗိုလ် ပုံဖော် ရိုက်ကူးထားတာ ဖြစ်ပါတယ်။ အဆိုပါ ဇာတ်လမ်းတွဲကိုတော့ MRTV-4 မှာ တနင်္လာကနေ သောကြာနေ့အထိ ည ၇ နာရီမှာ ပြသသွားမယ်လို့ ကြေညာထားပါတယ်။

You may also like these stories:

သင်ဇာဝင့်ကျော်နဲ့အတူ Gym ကစားနေတဲ့ အဆိုတော် မီးနို

“ကျောင်းဖွင့်ရင် ကြိုပို့လုပ်ရမယ့် လူကြီးတွေအတွက်လည်း စိတ်ပူတယ်”

The post စာရေးဆရာမကြီး မစန္ဒာရဲ့ ဝတ္ထု “ဂျီဟောသူ” ဇာတ်လမ်းတွဲ မကြာခင် ပြသမည် appeared first on ဧရာဝတီ.

မြန်မာရွှေ့ပြောင်းအလုပ်သမား ၁၉ ဦးအား မလေးရှားအလုပ်ရှင်မှ ပါးရိုက်ကာ သံရုံးရှေ့တွင် စွန့်ပစ်ခဲ့သည့် ကိစ္စနှင့် ပတ်သက်၍ အလုပ်ရှင်နှင့် အေဂျင့်ကို မလေးရှားနိုင်ငံဥပဒေအတိုင်း အရေးယူသွားမည်ဟု မလေးရှား နိုင်ငံဆိုင်ရာ မြန်မာသံရုံး အလုပ်သမား သံအရာရှိ ဦးအောင်ဇော်မင်း က ပြောသည်။

မလေးရှားနိုင်ငံဆိုင်ရာ မြန်မာအလုပ်သမားသံအရာရှိ ဦးအောင်ဇော်မင်း က “အရေးယူဖို့ရှိပါတယ်။ ဒါက မလေး ရှားအလုပ်ရှင်နဲ့ မလေးရှားအေဂျင့်ရဲ့ တာဝန်မယူမှုတွေဖြစ်တာမို့ အရေးယူဖို့အတွက် ကျနော်တို့ လေဘာရုံး လည်း သွားပြီးပြီ။ အလုပ်သမားတွေကို မောင်းထုတ်တဲ့အတွက် လူဝင်မှုကြီးကြပ်ရေးကိုလည်း သွားအကြောင်း ကြားပြီပါပြီ။ ပါးရိုက်ခံရတဲ့ သူအတွက် မနက်ဖန်တော့ ရဲစခန်းသွားတိုင်မယ်။ အလုပ်သမားတွေ နစ်နာကြေးရဖို့ နဲ့ အိမ်ပြန်ဖို့အတွက် ကျနော်တို့ ဆောင်ရွက်နေပါတယ်”ဟု ဧရာဝတီသို့ ပြောသည်။

အဆိုပါ မြန်မာလုပ်သား ၁၉ ဦးသည် စက်ရုံတွင် ဝရိန်လုပ်သားအဖြစ် အလုပ်လုပ်ရန် တရားဝင် စာချုပ်စာတမ်းဖြင့် မလေးရှားနိုင်ငံသို့ ဖေဖော်ဝါရီလ ၆ ရက်က ရောက်ရှိခဲ့ခြင်းဖြစ်သည်။ စက်ရုံတွင် တလကို မလေးရှား ရင်းဂစ် ၃၀၀၀၊ ၄၀၀၀ (ကျပ် ၁၀ သိန်းကျော်) ရမည့်အလုပ်ဟု အေဂျင့်က ပြောဆိုထားသော်လည်း မလေးနိုင်ငံရောက်သည့်အခါ ဆောက်လုပ်ရေးတွင် အလုပ်ရခဲ့သည်။

လစာကိုလည်း မလေးရှားဥပဒေအတိုင်း တလလျှင် မလေးရှား ရင်းဂစ် ၁၂၀၀ ရမည်ဆိုသဖြင့် အလုပ်ရှင်နှင့် ညှိနှိုင်း နေဆဲ ကာလတွင် ကူးစက်မြန် Covid-19 ကပ်ရောဂါဖြစ်ကြောင်း စွန့်ပစ်ခံခဲ့ရသည့် မြန်မာ လုပ်သား ၁၉ ဦးထဲက ကိုသန်းထိုက်အောင်က ပြောသည်။

Covid-19 အခြေအနေကြောင့် အလုပ်များ ရပ်ဆိုင်းခဲ့သဖြင့် အလုပ်သမားများမှာ အလုပ်မရှိ၊ ဝင်ငွေမရှိနှင့် အပြင်ထွက်ခွင့်မရဘဲ ပိတ်မိနေခဲ့ခြင်း ဖြစ်သည်ဟု သိရသည်။

ကိုသန်းထိုက်အောင် က “၃၀ ရက် မနက် ၁၁ နာရီခွဲလောက်မှာ မလေးကို ရောက်နေတာကြာပြီဖြစ်တဲ့ ကိုမျိုးမင်းက လာခေါ်တယ်။ အဝတ်အစားတွေ တခါထဲထည့်ခဲ့။ အလုပ်လုပ်ရင် ခေါ်ထားမယ်။ အလုပ်မလုပ်ရင် ပြန်ပို့မယ်ပြောတော့ ကျနော် တို့က ဘာဖြစ်လို့လဲ။ အလုပ်ရှင်နဲ့ပြောမယ်လို့ ပြောတော့ တွေ့လို့မရဘူးတဲ့။ အဲဒါနဲ့ စက်ရုံရှေ့မှာ တန်းစီလိုက်တယ်။ သူဌေးက လာကတည်းက တုတ်တွေကိုင်လာတယ်။ စက်ရုံထဲက ဘင်္ဂလားကောင်တွေကို ခေါ်လာတယ်။ သူတို့လည်း တုတ်တွေကိုင်ထားတယ်။ ကျနော်တို့ထဲက မလေးစကားနားလည်ပြီး ဘာသာပြန် ပေးနေတဲ့ သူက ဘယ်သူလဲလို့ သူဌေးက မေးတော့ သူ (ကိုနိုင်လင်း) ပါဆိုပြီးတော့ သူ့ကို ဘာမှ မပြောပဲနဲ့ ပါးရိုက်တယ်” ဟု ပြောသည်။

၎င်းက ဆက်၍ “နောက် ကျနော်တို့ ၁၉ ဦးကတော့ အထုပ်တွေနဲ့ အပြင်မှာစောင့်နေရပြီး ကား ၂ စီးနဲ့ ကျနော်တို့ကို တင်ခေါ်သွားတော့ လမ်းတောက်လျှောက် သံရုံးကို ဆက်နေတာ။ သံရုံးကလည်း မလာခဲ့နဲ့ပဲ ပြောတယ်။ အေဂျင့်ကလည်း သံရုံးရှေ့ထိရောက်အောင်ပို့တယ်။ သံရုံးရှေ့ရောက်တော့ ၂ နာရီခွဲပြီ ကျနော်တို့ကို ဒီအတိုင်းချပေးခဲ့တယ်” ဟု ရှင်းပြပြောဆိုသည်။

၎င်းတို့ ဆောက်လုပ်ရေးလုပ်ငန်းခွင်သို့ ရောက်ရှိသည့် အချိန်မှ စပြီး အလုပ်ရှင်က စားသောက်နေထိုင်မှု အတွက် တစုံတရာလုပ်ဆောင်ပေးခြင်း မရှိသဖြင့် စားသောက်နေထိုင်မှုအခက်အခဲဖြစ်ခဲ့ရသည်။ ထိုအတွက် မလေးရှားနိုင်ငံရောက် မြန်မာလုပ်သားအရေး ဆောင်ရွက်ပေးနေသည့် တမိလ်းလူမူကူညီရေး အသင်းနှင့် မြန်မာလူမူကူညီရေးအသင်းတို့က ၎င်းတို့အတွက် အခြေခံစားသောက်ကုန်များ ပို့ဆောင်ပေးခဲ့သည်ဟု သိရသည်။

တမိလ်းလူမူကူညီရေးအသင်း ဥက္ကဋ္ဌ ဦးမိုးက “ဒီမှာက မလေးရှားဥပဒေအတိုင်းအရေးယူတယ်။ ဒီလိုပြဿနာ တွေက ဒီမှာပဲ မဟုတ်ဘူး။ နေရာတကာမှာဖြစ်နေတယ်။ ဒီကောင်လေးတွေ ပြဿနာကျတော့ နည်းနည်းဆိုး သွားတယ်။ သူတို့က ရိုက်လည်းရိုက်တယ်။ သံရုံးရှေ့မှာ ပစ်ချသွားတယ်ဆိုတဲ့ကိစ္စက ဘောင်မဝင်ဘူး။ ဥပဒေမှာလည်း မရှိဘူး” ဟု ပြောသည်။

စွန့်ပစ်ခံမြန်မာလုပ်သားများအနေဖြင့် ၎င်းတို့ရသင့်ရထိုက်သော နစ်နာမှု၊ နိုင်ငံကူးစာအုပ်ပြန်လည်ရယူလိုပြီး မြန်မာနိုင်ငံသို့ ပြန်ရန် ဆန္ဒရှိနေကြသည်။

မလေးရှား ကျန်းမာရေးဝန်ကြီးဌာန၏ ထုတ်ပြန်ချက်အရ ၎င်းတို့ နိုင်ငံအတွင်း Covid-19 ကူးစက်ခံရသူ ၈ ထောင်ကျော် ရှိပြီး ပြန်သက်သာလာသူ ၆ ထောင် ၅ ရာကျော်နှင့် သေဆုံးသူ ၁၁၅ ဦး ရှိကြောင်း သိရသည်။

မြန်မာနိုင်ငံမှ မလေးရှားနိုင်ငံသို့ တရားဝင်ဖြစ်စေ၊ တရားမဝင်ဖြစ်စေ သွားရောက် အလုပ် လုပ်ကိုင် နေသည့် မြန်မာရွှေ့ပြောင်းလုပ်သား ၆ သိန်းဝန်းကျင်ရှိကြောင်း၊ ယခု Covid-19 ရောဂါကာလတွင် အရေးပေါ် နေရပ်ပြန် လိုသဖြင့် သံရုံးသို့ အွန်လိုင်းမှ စာရင်းပေးသွင်းထားသူ ၇၀၀၊ ၈၀၀ ခန့် ရှိသည်ဟု မြန်မာသံရုံးမှ သိရသည်။

You may also like these stories:

နိုင်ငံတော်၏ ကာကွယ်စောင့်ရှောက်မှုကို ရွှေ့ပြောင်းအလုပ်သမားများလည်း ရသင့်သည်

ရွှေ့ပြောင်းအလုပ်သမားတွေ အိမ်ပြန်လာကြတဲ့အခါ

ရွှေ့ပြောင်းအလုပ်သမားများ မဲပေးပိုင်ခွင့်သည် နိင်ငံသားအခွင့်အရေး ဖြစ်သည်


The post မလေးရှား သံရုံးရှေ့  စွန့်ပစ်ခံရသည့် မြန်မာ လုပ်သားများကိစ္စ အရေးယူမည် appeared first on ဧရာဝတီ.

COVID-19 ကြောင့် ထိခိုက်ခဲ့သော အသေးစား၊ အလတ်စားစီးပွားရေးလုပ်ငန်းများ (MSMEs) အတွက် ကျပ် ၆၄ ဘီလီယံ ခန့် ထုတ်ချေးသွားမည်ဖြစ်ကြောင်း စီမံကိန်း၊ ဘဏ္ဍာရေး နှင့် စက်မှု ဝန်ကြီးဌာနထံမှ သိရသည်။

ထို ချေးငွေသည် JICA SME နှစ်ဆင့်ချေးငွေ၏ ဒုတိယအဆင့် စီမံကိန်းဖြစ်ပြီး လုပ်ငန်းတခုလျှင် ကျပ်သန်း ၃၀၀ အထိ ထုတ်ချေးသွားမည်ဖြစ်ပြီး အပေါင်ပစ္စည်း ပေးအပ်နိုင်မှုအပေါ် မူတည်ကာ တနှစ်အတိုးနှုန်းသည် ၅ ဒသမ ၅ ရာခိုင်နှုန်း မှ ၁၀ ရာခိုင်နှုန်း ကောက်ခံသွားမည်ဖြစ်သည်။

ယင်းအပြင် သက်တမ်း ၃ နှစ်အောက် ချေးငွေများကို ဆိုင်းငံ့ကာလ ၆ လ သတ်မှတ်ထားပေးပြီး ချေးငွေ သက်တမ်း ၃ နှစ်မှ ၅ နှစ်ချေးငွေများကို ဆိုင်းငံ့ကာလ ၁ နှစ် ပေးသွားမည်ဖြစ်ကြောင်း အသေးစား အလတ်စား လုပ်ငန်းများ ဖွံ့ဖြိုး တိုးတက်ရေးဗဟိုဌာနထံမှ သိရသည်။

ဌာနညွှန်ကြားရေးမှူးချုပ် ဒေါ်အေးအေးဝင်းက “ဒီကာလမှာ လူတွေရဲ့ သုံးစွဲမှုက လျော့ကျသွားတာဖြစ်တဲ့ MSME လုပ်ငန်းတော်တော်များက ထိခိုက်ခဲ့ပြီး အကုန်ကျတာပေါ့။ အဲဒီတော့ ဒီချေးငွေကို ကျမတို့ ဒီဇွန်လထဲမှာပဲ ထုတ်ချေး သွားနိုင်အောင် လုပ်ဆောင်နေပါတယ် ” ဟု ဧရာဝတီသို့ ပြောသည်။

ယင်းအပြင် ကိုဗစ်ကြောင့် ပြောင်းလဲသော စီးပွားရေးပုံစံများကြောင့် အသေးစားအလတ်စားလုပ်ငန်းများ အနေဖြင့် တန်ဖိုးမြှင့်ထုတ်ကုန်များ ထုတ်လုပ်လာနိုင်ရေး နှင့် Smart Manufacturing လုပ်ငန်းများ ဖြစ်ပေါ်လာနိုင်ရေးအတွက် အသိပညာနှင့် နည်းပညာအကူအညီပေးရေး အစီအစဉ်များကိုလည်း လုပ်ဆောင်သွားရန် ရှိကြောင်းလည်း ၎င်းက ရှင်းပြသည်။

ယခုကဲ့သို့သော အခြေအနေမျိုးတွင် အသေးစား၊ အလတ်စားလုပ်ငန်းများ၏ ချေးငွေလျှောက်ထားမှုကို အပေါင် ပစ္စည်းကိုသာ အဓိက ဦးစားပေးကြည့်မနေသင့်ကြောင်း လုပ်ငန်းရှင်များက ထောက်ပြကြသည်။

JICA ၏ နှစ်ဆင့်ချေးငွေကို လျှောက်ထားခဲ့ဘူးသည့် လုပ်ငန်းရှင် ဦးကျော်သူက “အခုက ကိုဗစ်ကာလ ဖြစ်နေတာ ရိုးရိုး သာမန် အခြေအနေတုန်းက သတ်မှတ်ထားတဲ့ စည်းမျဉ်းစည်းကမ်းတွေနဲ့ ဆိုရင် SME လုပ်ငန်းတွေ အတွက် ချေးငွေ ဘယ်လိုမှ အဆင်ပြေမှာမဟုတ်ဘူး။ အစိုးရက ထုတ်ချေးတဲ့ အပေါင်ပစ္စည်း မလိုတဲ့ ဘီလီယံ ၁၀၀ ချေးငွေတောင် ရဖို့ ခက်ခဲနေတာ” ဟု ရှင်းပြသည်။

ချေးငွေ လျှောက်ထားရာတွင် လိုအပ်သည့် အပေါင်ပစ္စည်း၊ စီးပွားရေးဖော်ဆောင်မည့် အစီအစဉ် (Business Plan)၊ ငွေစာရင်းရှင်းတမ်းများ၊ တရားဝင် အမြတ်ခွန် ဆောင်ထားသော စာရွက်စာတမ်းများ စသည့် လိုအပ်ချက်များကို အသေးစားအလတ်စား လုပ်ငန်း အများစုမှာ အပြည့်အစုံတင်ပြနိုင်ရန် အခက်အခဲရှိနေကြပြီး ယင်းအတွက်ကြောင့် SME ချေးငွေများကို မြို့ပြ အခြေစိုက် အသေးစားအလတ်စားစီးပွားရေးလုပ်ငန်းအများစုသာ ရရှိလျက်ရှိ ကြောင်း ကော်ဖီစိုက်ပျိုး ထုတ်လုပ်သည့် လုပ်ငန်းရှင် ၁ ဦးက ဧရာဝတီသို့ ပြောသည်။

“ငွေချေးဖို့က အဓိက အပေါင်ပစ္စည်းပြဿနာပဲ၊ ဘဏ်တွေဘက်က မြို့ပေါ်က အိမ်တွေ မြေတွေ ထားမယ်ဆိုရင် ချေးငွေ မြန်မြန်ရနိုင်တယ်။ ချေးငွေလျှောက်ထားတဲ့ လုပ်ငန်းစဉ်အဆင့်ဆင့်ကိုလည်း ဖြေလျှော့ပေးသင့်တယ်။ ပြီးတော့ ငွေချေးဖို့ လိုအပ်ချက်တွေကို ပိုမိုသိရှိဖို့ ဘဏ်တွေနဲ့ ပူးပေါင်းပြီး အသေးစား အလတ်စားလုပ်ငန်းရှင်တွေကို အသိပညာ ပေးသင့်တယ်။” ဟု ယင်းလုပ်ငန်းရှင်က ထောက်ပြသည်။

လုပ်ငန်းရှင်များအနေဖြင့် အဆိုပါ ချေးငွေကို မြန်မာ့စီးပွားရေးဘဏ်၊ သမဝါယမဘဏ် (CB Bank)၊ ဧရာဝတီဘဏ် (AYA Bank)၊ နေပြည်တော်ဖွံ့ဖြိုးရေးဘဏ်၊ မြန်မာအရှေ့တိုင်းဘဏ် (MOB) အသေးစားနှင့် အလတ်စားလုပ်ငန်းများဖွံ့ဖြိုး ရေးဘဏ်၊ ပထမပုဂ္ဂလိကဘဏ် (FPB)၊ ယူအေဘီဘဏ် (UAB)၊ ကမ္ဘောဇဘဏ်(KBZ) နှင့် မြန်မာ့ရှေ့ဆောင် ဘဏ် (MAB) တို့တွင် လျှောက်ထားနိုင်ရန် စီစဉ်ဆောင်ရွက်လျက်ရှိကြောင်း သိရသည်။

အသေးစားအလတ်စားစီးပွားရေးလုပ်ငန်းများကို ၂၀၁၅ ခုနှစ်မှ စတင်ကာ JICA SME နှစ်ဆင့်ချေးငွေကို ပထမအဆင့် စီမံကိန်းအနေဖြင့် ကျပ် ၆၀ ဘီလီယံကျော်အထိ ထုတ်ချေးပေးထားလျက်ရှိကြောင်း သိရသည်။

ယခုသတင်းကို AYA Bank မှ ပံ့ပိုးကူညီတင်ဆက်ပါသည်”

ဆက်စပ်လင့်

စီးပွားရေး လုပ်ငန်း ၁ ထောင်ကျော်ကို အစိုးရ ကျပ် ၃၆ ဘီလီယံကျော် ထုတ်ချေး

စတုတ္တအကြိမ်မြောက် အစိုးရချေးငွေ တိုင်းနှင့်ပြည်နယ် လုပ်ငန်းရှင်များကို ဦးစားပေးမည်

လုပ်ငန်း ၁၁၁ ခုကို တတိယ အသုတ်အဖြစ် အစိုးရ ချေးငွေ ထုတ်ပေး

The post အသေးစား၊ အလတ်စားလုပ်ငန်းများအတွက် ကျပ် ၆၄ ဘီလီယံ ထုတ်ချေးမည် appeared first on ဧရာဝတီ.

မန္တလေးတိုင်းရှိ ဟိုတယ်များ စစ်ဆေးပြီးပါက တပြိုင်နက် ပြန်ဖွင့်ခွင့်ပြုမည်ဟု ဟိုတယ်နှင့် ခရီးသွား ကဏ္ဍ တာဝန်ယူထားသော မန္တလေးတိုင်း စီမံကိန်းနှင့် ဘဏ္ဍာရေးဝန်ကြီး ဦးမြတ်သူက ဧရာဝတီကို ပြောသည်။

“နေ့စဉ် စစ်ဆေးပြီး စာရင်းကို ဝန်ကြီးချုပ်ဆီတင်ပြထားတယ်။ ဝန်ကြီးချုပ် လက်မှတ်ထိုးပြီး ခွင့်ပြုတာနဲ့ ပြန် ဖွင့်ခွင့်ရမှာပါ။ ဟိုတယ်အများစုကလဲ ဒီကာလမှာ ဧည့်သည်မရှိသေးတော့ သိပ်မဖွင့်ချင်ကြသေးဘူးလို့ တင်ပြထားတာရှိတော့ စစ်ဆေးမှုအပိုင်းကို သေချာပြီးစီးအောင်လုပ်နေတယ်” ဟု ၎င်းက ပြောသည်။

မန္တလေးတိုင်းဟိုတယ်နှင့် ခရီးသွားညွှန်ကြားမှု ဦးစီးဌာနသို့ ကိုဗစ်ကာကွယ်ရေးလုပ်ငန်းများဆောင်ရွက်ပြီး အစစ်ဆေးခံရန် စာရင်းပေးထားသော ဟိုတယ်၊ တည်းခိုခန်းအရေအတွက် ၅၀၀ နီးပါးခန့်ရှိပြီး မန္တလေး၊ ပြင်ဦးလွင်၊ ပုဂံဒေသအစရှိသော ဒေသတို့မှ ဖြစ်ကြောင်း တိုင်းအစိုးရအဖွဲ့မှ သိရသည်။

မန္တလေးတိုင်း ဟိုတယ်နှင့် ခရီးသွား ညွှန်ကြားမှု ဦးစီးဌာနမှ လက်ထောက် ညွှန်ကြားရေးမှုးဦးစန်းယုက “မေမြို့ ဇုန်ကလည်း စစ်နေတာ ပြီးသလောက်ရှိပြီ၊ သူတို့ ပြင်ဆင်ထားတာတွေလည်း အတော်လေး ပြည့်စုံတယ် လို့ ပြောလို့ရမယ်။ ဟိုတယ်တွေအနေနဲ့ စစ်ဆေးခံပြီးပြီ ဖြစ်ပေမဲ့ တိုင်းအစိုးရအဖွဲ့ ခွင့်ပြုချက် ရမှဖွင့်ခွင့် ရမှာဖြစ်တယ်” ဟု ဧရာဝတီသို့ ပြောသည်။

ဇွန် ၃ ရက်အထိ စစ်ဆေးပြီးအရေအတွက် ၉၅ လုံးရှိပြီး ၎င်းတို့အား ပြန်လည် ဖွင့်လှစ်ခွင့်ပြုရန် တိုင်းဝန်ကြီး ချုပ်ထံ တင်ပြထားကြောင်း စစ်ဆေးမှုအပိုင်းကိုလည်း ကွင်းဆင်းအဖွဲ့များက နေ့စဉ်ခရိုင် အလိုက် ဆောင်ရွက်နေကြောင်း ဆိုသည်။

ပုဂံဟိုတယ်ဇုန်ဥက္ကဌဦးဇော်ဝိတ်က “ဒီမှာအစစ်ခံဖို့ စာရင်းပေးတာ ဟိုတယ်ကြီးတွေလောက်ပဲရှိတယ်။ အရေအတွက်က နည်းပါတယ်။ အများစုက ပြန်ဖွင့်ဖို့ အဆင့်သင့်မဖြစ်သေးသလို ဖွင့်လည်း မဖွင့်ချင်ကြ သေးဘူး။ အဓိကက ဧည့်သည်မရှိသေးတာရယ်၊ လုပ်ငန်းပြန်စပြီဆိုတာနဲ့ ဝန်ထမ်းကလဲ မခေါ်ထားလို့ မရ သလို မဖြစ်မနေကုန်မဲ့ ကုန်ကျစရိတ်တွေက တက်လာမှာလေ။ အဲဒါကြောင့် ပြန်ဖွင့်ဖို့ စိတ်ဝင်စားမှုနည်း နေတယ်လို့ ပြောရမယ်” ဟု ဧရာဝတီကို ပြောသည်။

မန္တလေးတိုင်း ဟိုတယ်နှင့် ခရီးသွား ညွှန်ကြားမှု ဦးစီးဌာနမှ လက်ထောက် ညွှန်ကြားရေးမှုး ဦးစန်းယုက “လုပ်ငန်းရှင်တွေအနေနဲ့ ဒီလိုကာလမှာ ကြိုတင်ပြင်ဆင်တာတွေ လုပ်တာမျိုး ရှိသလို စီးပွားရေး တွက်ခြေ ကိုက်မှုကိုလဲ ချိန်ဆနေတာမျိုးလည်းရှိတော့ ဟိုတယ်တွေအားလုံးကတော့ တပြိုင်နက်တော့ ဖွင့်ကြမှာ မဟုတ်သေးဘူး” ဟု ပြောသည်။

ကိုဗစ်ကာကွယ်ရေး အစစ်ဆေးခံပြီး ပြန်ဖွင့်ရန်ပြင်ဆင်နေသည့် ဟိုတယ်အများစုသည် လက်ရှိအခြေအနေ အရ Physical Distancing အတွက် မူလရှိသော ဝန်ထမ်းအင်အားနှင့် ဟိုတယ် အခန်း အရေအတွက်၏ ထက်ဝက်ခန့်သာ လုပ်ငန်း စတင်လည်ပတ်ရန် စီစဉ်ထားသလို အခန်းဌားရမ်းမှု နှုန်းများ၊ ဝန်ဆောင်မှုပုံစံ များလည်း အနည်းငယ်အပြောင်းအလဲရှိမည်ဟု ဟိုတယ်လုပ်ငန်းရှင် များက ပြောသည်။

ကိုဗစ်ကြောင့် ယာယီပိတ်ထားရန် ညွှန်ကြားထားသော မန္တလေးတိုင်းရှိ ဟိုတယ်၊ မိုတယ်၊ တည်းခိုခန်း များအား ကျန်းမာရေးနှင့်အားကစားဝန်ကြီးဌာန၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့ အင်အား ဝန်ကြီးဌာန၊ ကျွမ်းကျင်မှုဆိုင်ရာပူးပေါင်းအဖွဲ့များ၏ စစ်ဆေးမှုများခံယူပြီး သတ်မှတ်ချက် များနှင့် ကိုက်ညီပါ က ပြန်လည်ဖွင့်လှစ် ခွင့်ပြုမည်ဟု မေ ၃ရက်က အလုပ်သမား၊ လူဝင်မှုကြီးကြပ် ရေးနှင့် ပြည်သူ့အင်အား ဝန်ကြီးဌာနက ထုတ်ပြန်ကြေညာခဲ့သည်။

ယခုသတင်းကို AYA Bank မှ ပံ့ပိုးကူညီတင်ဆက်ပါသည်”

The post မန္တလေးတိုင်းရှိ ဟိုတယ်များ စစ်ဆေးပြီးပါက တပြိုင်နက် ဖွင့်ခွင့်ပေးမည် appeared first on ဧရာဝတီ.

လာမည့် ရွေးကောက်ပွဲအတွက် မဲဆန္ဒရှင်စာရင်း ပြုစုရာတွင် တပ်မတော်သားများနှင့် အတူနေ အိမ်ထောင်စုဝင်များ၏ စာရင်း ကျန်နေ၍ ဆက်လက် ကောက်ယူရန် ပြင်ဆင်နေကြောင်း ပြည်ထောင်စုရွေးကောက်ပွဲကော်မရှင် (UEC)၏ သတင်းထုတ်ပြန်ချက်များအရ သိရသည်။

UEC ၏ တရားဝင် လူမှုကွန်ရက်စာမျက်နှာ၌ ပြောင်းလဲနေသော လူဦးရေစာရင်း အချက်အလက်များအပေါ် မူတည်၍ ပြုစုပြီးစီးသည့် အခြေခံမဲဆန္ဒရှင် စာရင်းများကို လစဉ်ပြုစုခြင်း၊ ပြင်ဆင်ခြင်းနှင့် ထိန်းသိမ်းခြင်းတို့ ဆက်လက် ဆောင် ရွက်လျက်ရှိပြီး တပ်မတော်သားများနှင့် အတူနေ အိမ်ထောင်စုဝင်များ၏ စာရင်းများ ဆက်လက်ကောက်ယူပြုစုလျက် ရှိကြောင်း ဇွန် ၂ ရက်နေ့က ဖော်ပြထားသည်။

ရန်ကုန်တိုင်း ရွေးကောက်ပွဲကော်မရှင်အဖွဲ့ခွဲ အဖွဲ့ဝင်(၂)၊ တိုင်းပြောရေးဆိုခွင့်ရှိသူ ဦးစန်းမြင့်က တပ်မဲစာရင်း ကောက်ယူရေးသည် ပြည်ထောင်စုရွေးကောက်ပွဲကော်မရှင်က ကာကွယ်ရေးဦးစီးချုပ်ရုံး(ကြည်း)နှင့် ညှိနှိုင်း ပြီးမှသာ ကော်မရှင်အဖွဲ့ခွဲများက ဆက်လက်ဆောင်ရွက်ခွင့် ရှိသည်ဟု ပြောသည်။

“ကာကွယ်ရေး ဦးစီးချုပ်ရုံး (ကြည်း) နဲ့ ပြည်ထောင်စုရွေးကောက်ပွဲကော်မရှင်က ညှိနှိုင်းအကြောင်းကြားထားချက်ရှိလို့ တိုင်းဒေသကြီး၊ ပြည်နယ် ကော်မရှင်တွေက သက်ဆိုင်ရာ တိုင်းစစ်ဌာနချုပ်တွေနဲ့ ညှိနှိုင်းပြီးတော့ နယ်မြေခံ တပ်ရင်း တပ်ဖွဲ့တွေနဲ့ မဲဆန္ဒရှင်စာရင်း အခြေခံစစ်သည်နဲ့ သူတို့ မိသားစုဝင်တွေ မဲဆန္ဒရှင်စာရင်း ကောက်ယူဖို့ ပြင်ဆင်ထားပါ ပြီ” ဟု ၎င်းက ရှင်းပြသည်။

တပ်မဲစာရင်းကို မည်သည့်နေ့ရက်တွင် အပြီးသတ်ပေးရမည်ဟု ကာလ မသတ်မှတ်ထားသော်လည်း ပထမအကြိမ် မဲဆန္ဒရှင်စာရင်း ကြေညာသည့်အချိန်၌ (စာရင်း)အကုန်ပါမည်ဖြစ်ကြောင်း ဦးမြင့်စန်းက ပြောသည်။

“တိုင်းကော်မရှင်က သက်ဆိုင်ရာ တိုင်းစစ်ဌာနချုပ်နဲ့ ညှိနှိုင်းမယ်။ တွေ့ဆုံမယ်။ ပြီးရင် သက်ဆိုင်ရာ မြို့ နယ် အ လိုက် နယ်မြေခံ တပ်ရင်းတပ်ဖွဲ့တွေကို ဆက်သွယ်ဆောင်ရွက် တောင်းခံမှာ ဖြစ်ပါတယ်” ဟု ၎င်းက ဆိုသည်။

၂၀၂၀ အထွေထွေ ရွေးကောက်ပွဲအတွက် ကြိုတင်ပြင်ဆင်သည့်အနေဖြင့် ၂၀၁၉ ခုနှစ်ကို မဲဆန္ဒရှင်စာရင်း ပြုစုသည့် နှစ်အဖြစ် သတ်မှတ်၍ တနိုင်ငံလုံး၏ အခြေခံ မဲဆန္ဒရှင် စာရင်းများ ပြုစုရာ ၂၀၂၀ မတ်လအထိ အခြေခံမဲဆန္ဒရှင် ၃၇ သန်းကျော်ရှိကြောင်း သိရသည်။

မြန်မာ့တပ်မတော်တွင် အင်အား ၅ သိန်းခန့် ရှိသည်ဟု ခန့်မှန်းရပြီး မိသားစုဝင်များနှင့် ပေါင်းလိုက်သောအခါ ၂၀၁၅ ရွေးကောက်ပွဲတွင် မဲပေးခွင့်ရှိသူ ၃၂ သန်းအနက် တပ်မတော်နှင့် ပတ်သက်သူ စုစုပေါင်း ၁ သန်းခန့် ရှိလာ ကြောင်း ယူဆချက်များလည်း ရှိသည်။

ရှမ်းတိုင်းရင်းသားများဒီမိုကရေစီအဖွဲ့ချုပ် (SNLD)၏ ပြောရေးဆိုခွင့်ရှိသူက ဦးစိုင်းလိတ်က “တချို့ မဲဆန္ဒနယ်တွေမှာ တခြမ်းလောက်က စစ်တပ်ရဲ့ အပိုင်လိုမျိုး စစ်တပ်ရဲ့ မဲပေးပိုင်ခွင့်က ပိုပြီးတော့မှ အင်အားကြီးနေတာမျိုး ရှိတယ်။ အဲဒီ လို မဲပေးတဲ့အခါမှာ တကယ်တမ်းရှိနေတဲ့ ရဲဘော်တွေရဲ့ အရေအတွက် အရာရှိ၊ စစ်သည် အကုန်လုံးအပါ မဲပေးပိုင်ခွင့် အမှန်တကယ်ရှိတဲ့ စာရင်းကို သေချာ မစိစစ်နိုင်ဘူးဆိုရင် ကြိုတင်မဲဖြစ်ဖြစ် ထည့်လာတဲ့မဲဖြစ်ဖြစ် ဘယ်ရေချိန် ဘယ် ပေတံနဲ့ တိုင်းမလဲ။ အဲဒီအခါ ယှဉ်ပြိုင်ဘက်တွေအဖို့ အင်မတန်ကို နစ်နာပါတယ်” ဟု ပြောသည်။

ထို့ကြောင့် တပ်မဲစာရင်းများကိုလည်း တခြားနိုင်ငံသားများနည်းတူ နိုင်ငံရေးပါတီများရော၊ ကော်မရှင်ကပါ စိစစ်နိုင်ရန် အတွက် စီစဉ်ပေးရန် လိုအပ်သည်ဟု ၎င်းက ဆိုသည်။

ရွေးကောက်ပွဲစောင့်ကြည့်လေ့လာရေး အဖွဲ့တဖွဲ့ဖြစ်သည့် PACE အဖွဲ့ ဒါရိုက်တာ စိုင်းရဲကျော်စွာမြင့်ကလည်း “ရွေးကောက်ပွဲရဲ့ ပွင့်လင်းမြင်သာမှုအရ တပ်ရင်း တပ်ဖွဲ့ဝင်တွေ ဘယ်လောက်ရှိတယ်ဆိုတာကို ပွင့်ပွင့်လင်းလင်း သိ ထားဖို့ လိုတာပေါ့။ ဒါမှလည်း အားလုံးက စိတ်ကင်းကင်းနဲ့ လုပ်နိုင်ကြမှာ။ မဟုတ်ရင် သံသယတွေ ဖြစ်နေကြမှာပေါ့” ဟု မှတ်ချက်ပြုသည်။

ဆက်လက်၍ ၎င်းက ရေရှည်တွင် တပ်မတော်မိသားစုများသာမက တခြားလုံခြုံရေးဆိုင်ရာ တပ်ဖွဲ့များ၊ ပြည်သူ့ ဝန်ထမ်းများအနေဖြင့် ရွေးကောက်ပွဲတွင် ကြိုက်နှစ်သက်သည့် ပါတီကို မဲပေး၊ ထို့အတွက် တန်ပြန်အရေးယူခံ ရခြင်းမျိုး မရှိဘဲ လွတ်လွတ်လပ်လပ် မဲပေးခွင့်ရသည့် အခြေအနေမျိုး ဖန်တီးပေးနိုင်ရန် လိုအပ်သည်ဟု ဆိုသည်။

ထို့အတူ တိုင်းရင်းသား လက်နက်ကိုင်အဖွဲ့များ ရှိသည့်နေရာ၌လည်း မဲဆန္ဒရှင်အနေဖြင့် ကြိုက်နှစ်သက်သည့် ပါတီ ကို မဲပေးခွင့်ရှိရန် လိုအပ်သည်ဟုလည်း စိုင်းရဲကျော်စွာမြင့်က ပြောသည်။

“လက်နက်ကိုင် ခြိမ်းခြောက်ပြီး ပါတီတခုခုကို မဲပေးခိုင်းတာမျိုး ဆိုရင်တော့ နိုင်ငံသားတွေအနေနဲ့ သူတို့မဲပေးပိုင်ခွင့် ကို ပြည့်ပြည့်ဝဝ အသုံးချခွင့်ရတယ်လို့ မထင်ဘူး” ဟု ၎င်းက ဆိုသည်။

UEC က မဲစာရင်းများကို နိုင်ငံရေးပါတီများထံ တိုက်ရိုက်ပေးခြင်းမရှိဘဲ သက်ဆိုင်ရာ မြို့နယ်ကော်မရှင်အဖွဲ့ခွဲများမှ တဆင့် ရွေးကောက်ပွဲဝင်မည့် လွှတ်တော်ကိုယ်စားလှယ်လောင်းများအား Memory Stick ဖြင့်ကူးပြီး ပေးကြောင်း၊ ပေးသည့် အချိန်ကာလမှာ ရွေးကောက်ပွဲနှင့် နီးကပ်လွန်းရာ မဲစာရင်းနှင့် ပတ်သက်၍ တစုံတရာ အငြင်းပွားဖွယ်ရှိ ပါက ပြောဆိုရန် အခက်ခဲရှိကြောင်း ဦးစိုင်းလိတ်က ရှင်းပြသည်။

၂၀၂၀ ရွေးကောက်ပွဲတွင် တပ်တွင်းမဲရုံ မထားတော့ခြင်းသည် လူဦးရေစာရင်းနှင့်တကွ မဲစာရင်းတိုက်ပြီးမှ မဲပေးသည့် အနေအထားသို့ ရောက်သွားသဖြင့် ပွင့်လင်းမြင်သာမှု အနည်းငယ် ပိုရှိလာသည်ဟု ယူဆရပြီး ကောင်းသည့် အနေ အထားတခုအဖြစ် ၎င်းက မှတ်ချက်ပြုသည်။

“ဒါပေမယ့် စောစောကပြောတဲ့ တပ်ရဲ့ မဲစာရင်း ဘယ်လောက်ရှိတယ်ဆိုတာ အတိအကျ မသိဘဲနဲ့ အဲဒီလူတွေ ထွက် လာရုံနဲ့ကတော့ ကြိုတင်မဲဆိုတဲ့ စကားလုံးတလုံးနဲ့ ထပ်ပြီးတော့ ဒုက္ခရောက်အုံးမှာပဲ။ အဲဒါကြောင့်မို့ တပ်မဲစာရင်း ကတော့ ပိုပြီး လိုအပ်ပါတယ်” ဟု ၎င်းက ဆိုသည်။

ပြည်သူ့လွှတ်တော် ရွေးကောက်ပွဲ နည်းဥပဒေ၊ အခန်း(၃) မဲစာရင်းများပြုစုခြင်း၊ ပုဒ်မ ၇ ပုဒ်မခွဲ(ခ)တွင် ဆန္ဒမဲပေးခွင့်ရှိ သည့် တပ်မတော်ကြည်း၊ ရေ၊ လေတပ်ဖွဲ့ဝင်များနှင့် ၎င်းတို့၏ အိမ်ထောင်စုဝင်များအတွက် မဲစာရင်းပြုစုရာ၌ ရပ်ကွက် (သို့) ကျေးရွာအုပ်စု ကော်မရှင်အဖွဲ့ခွဲများ၏ တာဝန်နှင့်ပတ်သက်၍ ပုဒ်မခွဲငယ်များဖြင့် အသေးစိတ် ပြဋ္ဌာန်းထားသည်။

အဆိုပါ ပြဋ္ဌာန်းချက်အရ ကော်မရှင်အဖွဲ့ခွဲများအနေဖြင့် သက်ဆိုင်ရာ ရပ်ကွက်/ကျေးရွာအုပ်စုအတွင်း အခြေစိုက် လျက်ရှိသည့် တပ်ရင်းတပ်ဖွဲ့၊ တပ်ဌာနချုပ်များ၌ နေထိုင်ကြသော တပ်မတော် ကြည်း၊ ရေ၊ လေတပ်ဖွဲ့ဝင်များနှင့် ၎င်း တို့အိမ်ထောင်စုဝင်များ၏ အမည်များကို သက်ဆိုင်ရာ တပ်မှူး၏ အကူညီဖြင့် ၎င်းတို့တပ်ရင်းတပ်ဖွဲ့၊ တပ်ဌာနချုပ် တည်ရှိရာ ရပ်ကွက်၊ ကျေးရွာအုပ်စုတွင် မဲစာရင်းထည့်သွင်းရမည် ဖြစ်သည်။

သက်ဆိုင်ရာ တပ်တွင်း၌မနေဘဲ တပ်၏ပြင်ပ၌ နေထိုင်ကြသော တပ်မတော် ကြည်း၊ ရေ၊ လေ တပ်ဖွဲ့ဝင်များ၊ ၎င်းတို့ နှင့်အတူ နေထိုင်ကြသည့် အိမ်ထောင်စုဝင်များ၏ အမည်များကို ယင်းတို့နေထိုင်ရာ ရပ်ကွက်၊ ကျေးရွာအုပ်စု မဲစာရင်း ၌ထည့်သွင်း ဆောင်ရွက်ရမည်ဟု ပြဋ္ဌာန်းထားသည်။

ဆက်စပ်ဖတ်ရှုရန်

၂၀၂၀ ရွေးကောက်ပွဲကို လာမည့် နိုဝင်ဘာလတွင် ကျင်းပမည်

၂၀၂၀ ရွေးကောက်ပွဲ ပါတီကြီးအချို့ ကြိုတင် ပြင်ဆင်

The post တပ်မဲစာရင်းကောက်ရန် ကော်မရှင် ပြင်ဆင် appeared first on ဧရာဝတီ.

တနသာၤရီတိုင်းဒေသကြီး မြိတ်မြို့နယ်ရှိ မြိတ်ရေတပ်စခန်းဌာနချုပ်တွင် ဇွန်လ ၃ ရက်နေ့ ညနေ ၅ နာရီခန့်ကတပ်တွင်း ဖူဆယ်ဘောလုံးပွဲကို ကြည့်ရှူနေစဉ် မိုးကြိုးပစ်ခံရပြီး ၅ ဦးသေဆုံးကာ ၇ ဦး ဒဏ်ရာရခဲ့ကြောင်း သတင်းရရှိသည်။

ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနမှ ညွှန်ကြားရေးမှူး ဒေါ်ဖြူလဲ့လဲ့ထွန်းက “သေသွားတာက အမျိုးသမီး ၄ ယောက်၊ ကလေး ၁ ယောက်ပါ။ ဒဏ်ရာရတဲ့သူတွေက ဆေးရုံမှာ” ဟု မြိတ်ရေတပ်စခန်းဌာနချုပ်တွင် မိုးကြိုးပစ်ခံရသည့် ဖြစ်စဉ်ကို ပြောပြသည်။

ယင်းနေ့ တရက်တည်းတွင်ပင် စစ်ကိုင်းတိုင်းဒေသကြီး၊ ရေဦးမြို့နယ်တွင်လည်း မိုးကြိုးပစ်ခံရမှုကြောင့် အမျိုးသမီးတဦးနှင့် ကလေးငယ်တဦး သေဆုံးခဲ့သဖြင့် တရက်တည်း မိုးကြိုးပစ်ခံရ၍ သေဆုံးသူ စုစုပေါင်း ၇ ဦး ဖြစ်သွားကြောင်း  ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာနမှ သိရသည်။

မိုးကြိုနှင့် မုတ်သုံအဝင်ကာလ ဧပြီ၊ မေ၊ ဇွန်နှင့် မုတ်သုံ ပြန်ထွက်သည့် စက်တင်ဘာ၊ အောက်တိုဘာကာလ များသည် မိုးကြိုးပစ်သည့် ဖြစ်စဉ် အများဆုံးဖြစ်လေ့ရှိကြောင်း မိုးလေဝသနှင့် ဇလဗေဒ ညွှန်ကြားမှု ဦးစီးဌာန ညွှန်ကြားရေးမှူးချုပ် ဦးကျော်မိုးဦးက ပြောသည်။

ဦးကျော်မိုးဦးက “ဒီရာသီက လေထုမတည်ငြိမ်မှုတွေ ဖြစ်တဲ့အခါ မိုးတိမ်တောင်တွေ ဖြစ်လာတယ်။ မိုးတိမ်တောင်တွေ ကနေ မိုးကြိုးပစ်တယ်။ လျှပ်စီးလက်တယ်။ မိုးသီးကြွေကျတာတွေ ဖြစ်လာတာပေါ့”ဟု ဆိုသည်။

ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာန စာရင်းများအရ တနိုင်ငံလုံးတွင် ဧပြီလ ၉ ရက်နေ့မှ မေလ ၂ ရက်နေ့အတွင်း လေပြင်း တိုက်ခတ်မှုကြောင့် နေအိမ်ပြိုကျပျက်စီးမှု ၁၀၀၀ ဝန်းကျင်၊ တစိတ်တပိုင်း ပြိုကျပျက်စီးမှုမှာ ၁၃၀၀၀ ခန့်ရှိကြောင်း၊ ဘာသာရေးအဆောက်အဦ တစိတ်တပိုင်း ပျက်စီးမှုမှာ ၂၅၀ ခန့်ရှိကြောင်း သိရသည်။

အဆိုပါကာလအတွင်း လေပြင်းတိုက်ခတ်မှုများကြောင့် သေဆုံးသူမှာ ၁၀ ဦးခန့်ရှိပြီး ဒဏ်ရာရရှိသူမှာ ၂၈ ဦး ရှိခဲ့ကြောင်း သိရသည်။ ပျက်စီး ဆုံးရှုံးမှုများနှင့် သေဆုံးဒဏ်ရာရရှိမှုများအတွက် အတွက် ကျပ်ငွေ ၈၅၂ သန်းကျော်ဖိုးခန့် ထောက်ပံ့ခဲ့ကြောင်း ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာန မှ သိရသည်။

You may also like these stories:

ဧရာဝတီတိုင်း၌ တလကျော် အတွင်း မိုးကြိုးပစ်ခံရ၍ ၁၅ ဦး သေဆုံး

The post မြိတ် ရေတပ်စခန်းဌာနချုပ် ဘောလုံးပွဲ မိုးကြိုးထိမှန် ၅ ဦးသေဆုံး appeared first on ဧရာဝတီ.